Tlawmna kara beiseina hmutu Klopp

Premier League tawp niah uiawm takin Liverpool an champion zo lo a, point 92 ngawt hmu chungin champion nomawi hawn tur an nei lo.

Mahse, FA Cup leh League Cup champion tawh Reds hian beidawn phah nan hman a tum lo - Champions League final khelh tur an la nei tih an hria a, European football roreltu ni turin Paris khawpui lam an hawi leh tawh.

Reds manager Jurgen Klopp chuan, "Kan theihna zawng zawng kan hlan dawn. Harsatna engmah awm loa final khelh hi a la thleng ngai lo - zanina league nomawi kan chawi phak lohna hian Champions League champion ni turin min ti tuihal lehzual a ni," a ti!

Hei hi a ni...ka chanchin!
Klopp-a enkawlna hnuaiah Liverpool hian 2018-19 season khan Premier League-ah pahnihna dinhmun an lo luah tawh a, hemi ṭum pawh hian point 97 zet an hmu - mahse, point khat bawkin City an phak lo a, an champion zo lo.

German coach chuan, "Pahnihna ni chunga season khar hi chu ka hringnun thawnthu a ni ber tawh. Germany-ah pawh promotion hmu zo lo zinga point hmu hnem ber record ka la chelh mek - champion tur chuan midang zawng aia point hmuh hnem a ngai a, mahse, kan ti tlat lo a ni," a ti.

Kum 54 mi Klopp hi Liverpool-a pan hnuah pawh league-ah vawi hnih ngawt chu pahnihna a ni ta a, League Cup, Europa League leh Champions League-ah final lutin a tlawm vek tawh - Europa League tih lohah hi chuan a champion leh vek tawh tho tih erawh hriat a ṭha.

A tawp thlengin
Klopp chuan league chungchang sawi zawmin, "Theihna zawng zawng hlan bak piahlam chu tih theih a awm lo a, chutiang tak chuan ka naute chuan an ti. Khawvela team ṭha ber a tawp thlengin kan um a, a ropui ka ti - team ṭha tak kan din leh ang a, kan beidawng lo ang," a ti.

Liverpool hian Fulham rawlthar duhawm Fabio Carvalho an lakluh thu an puang fel der tawh a, kum 19 mi attacking midfielder man zat hi pound maktaduai nga niin, a khelh ṭhat dan a zirin pound maktaduai 2.7 pek belh leh tur a ni ang.

Reds hian thlasik transfer-ah khan Carvalho hi inremna an lo neihpui tawh a, mahse, transfer khar hmain an tifel hman lo. Premier League-a Fulham an kir leh theih nana goal 10 leh assist vawi riat neitu hi an inrempui leh ta tho a, July 1-ah Reds hi official-in a zawm dawn - kum nga chhung atan contract a ziak.

Beiseina
Liverpool hian May 28, zan dar 12:30-ah Real Madrid nen European champion nih an la inchuh dawn - Spanish club hi an hneh a nih chuan league nomawi chawi lo mah se season duhawm tak an hmang, tiin a sawi theih ang.

Klopp chuan, "Season tirah khan tun dinhmun anga din kan duh leh duh loh min zawt ta se, lawm takin ka pawm ang - league champion tak erawh ka sawi thei lo. Ropui taka champion duh chuan tlawm tur pawha inpuahchah tel a ngai ṭhin. A pawimawh ber chu kan tlawm hnua kan insiamṭhat dan hi a ni. League-ah chuan insiamṭhat a har tawh a, mahse, season thar atan chuan kan thei.

"Vawi tam ka hrilh tawh a, he team aia ṭha zawk hi ka la enkawl lo. Zing tin anni nena thawhho hi nuam ka ti - PL-a kan champion loh chhan kan hria a, season chawhma lama kal tluan kan zir a ngai. Hmasawnna tur kan nei a, chutah chuan kan insiamṭha ang," a ti.

A la tawp lo
Klopp chuan bazar chiam an tum loh thu sawiin, "Mi 10 vel thlak danglam a ngai lo hi ka lawm a, kan neihsa hi kan thuam ṭha ringawt ang. Kan club pawn lama mi ten he club danglamna hi an hre lo a nih chuan sawi dan ka thiam lo," a ti a, "Kan nomawi pathumna kan chawi ngei ka beisei," a ti zui.

Liverpool tan Salah a dam tawh a, Virgil van Dijk leh Fabinho chu Champions League final-a inlan thei tawh tura beisei an ni a, hetihlai hian Thiago Alcantara erawh league match tawp berah a inhliam thung.

Klopp chuan, "Thiago hi final-a a inlan theih ka ring lo a, huai takin ka sawi ngam lo. A bai chhuak tlat mai a, thil ṭha a ni lo," a ti - he thu buatsaih thleng hian a dinhmun a la chiang lo.