Ten Hag pui tur Der Gaag leh McClaren

Manchester United chuan asisstant coach atan Mitchell van der Gaag leh Steve McClaren te an lakluh thu nimin khan an puang. Van der Gaag leh McClaren te hian Ten Hag nen Man United leh Palace inkhel an thlir ho.

Van der Gaag hi Ten Hag nena inkawp sa an ni a, season liam ta khan Ajax-ah assistant manager hna a chelh. Dutch manager hian Ten Hag a puih hma hian kum hnih chhung Ajax reserve team a enkawl a ni.

Kum 50 mi Van der Gaag hi a inkhelh hun laiin centre back a ni a, Dutch club ṭha PSV-ah bul ṭanin Scottish club Motherwell, Dutch club NEC, Utrecht leh Sparta Rotterdam bakah Portuguese club Marítimo leh Saudi Arabian club Al-Nassr tan te pawh a khel tawh. Manager hna hi kum 2008 aṭang khan a thawk ṭan tawh a, a club hlui Marítimo aṭangin bul a ṭan.

Steve McClaren erawh English football-ah mi thar a ni lo a, England manager hial a nih tawh bakah Sir Alex Ferguson hnuaiah a thawk tawh ṭhin a, Old Trafford-ah a mikhual lo. Ten Hag nen pawh hian Dutch club Twente-ah an thawk dun tawh a ni.