Zanin dar 7:30-ah IPL Qualifier 1 Gujarat Titans vs Rajasthan Royals

Indian Premier League Playoff chu khelh ṭan a ni dawn ta. Eden Gardens-ah zanin dar 7:30 hian Gujarat Titans leh Rajasthan Royals ten IPL Qualifier 1 an khel ang. Titans leh Royals inkhela chak zawk hian final an lut ang a, a chak lo zawkin Lucknow Super Giants leh Royal Challengers Bangalore inkhela chak zawk nen final khel tur an zawng leh ang.

Intawnna hmasa
Team pahnih hi league round-ah vawi khat chauh an intawng a, team hlun zawk Rajasthan hi ṭhumvawrah an chungnung zawk chungin team thar Titans-in hnehna an chang.

April 14, Ningani khan Navi Mumbai-ah an inkhel a, Gujarat Titans-in 37 runs-in hnehna an chang. Titans hian an bat hmasa a, Hardik Pandya-a'n thi loin 87 runs a siam zarah over 20 chhungin 192/4 runs an vawk chhuak. Rajasthan Royals tan Jos Buttler-a'n 54 runs siam mah se 155/9 chauh an siam avangin an chak lo.

Qualifier 1 chu
IPL-ah player rual an fuankhawm a, inelna hmachhawn thei chin hi chu player ṭha tak vek an ni. Player ṭha rual zingah che ṭha bik an awm a, Royals batter Jos Buttler hi tun season-ah a che ṭha ber a, Giants tan all rounder Hardik Pandya leh batter Shubman Gill te an che ṭha bawk.

English batter Buttler hi match 14-ah inlan vekin 629 runs a siam a, a average pawh 48.38 niin a strike rate pawh 146.96 a ni pha hial. Buttler hian tun ṭum inelnaah hian six vawi 37 a vaw chhuak tawh a, four vawi 56 a vaw chhuak tawh bawk. Rajasthan-in final an khel dawn a nih chuan Buttler hi a khelh ṭhat ngei a ṭul ang.

Titans tan India chhuanvawr pahnih Hardik Pandya leh Shubman Gill te an rintlak hle. Hardik Pandya hian match 13 aṭangin 413 runs a siam a, Shubman Gill-a'n match 14 aṭangin 403 runs a siam ve bawk. South Africa batter David Miller-a'n 381 runs a siam tawh a, a tawi zawng chuan Titans hi team angin an che ṭha.

Team thar Titans hian Buttler anga che ṭha fal nei lo mah se league-ah pakhatna an ni a, Royals lakha pawh rinkai zawk an ni dawn. Bowling lamah Titans-in Rashid Khan leh Mohammed Shami te an kawl a, wicket 18 ve ve an la tawh. Chutihrualin Royals hian wicket la hnem ber Yuzvendra Chahal an kawl a, Titans hi an hlau bik lo ang.

Playoff
Qualifier 1 - May 24, Thawhlehni
Gujarat Titans 7:30 PM Rajasthan Royals
Eliminator - May 25, Nilaini
Lucknow Super Giants 7:30 PM Royal Challengers Bangalore