Leclerc chetsual niah Verstappen a vul

Formula 1 champion lai Max Verstappen chuan Spanish Grand Prix-ah hnehna a chang, a elpui Charles Leclerc a chetsual thung avangin Red Bull driver Max-a hian championship table lamah hma a hruai nghal.

Pathianni zan intlansiak hmuhnawmah Red Bull an chungnung viau, an driver ṭha Verstappen-a hnungah Sergio Perez a thleng bawk. Mercedes driver Lewis Hamilton pawh harsa takin a tho chhuak a, pangana dinhmun a luah hram.

Qualifier lama tlan ṭha Leclerc-a'n a hmasa ber aṭangin inelna bul a ṭan. Ferrari driver hi chak tura rinkai ber a ni - mahse engine chiang lo vangin a tlan tluan thei lo, championship hmahruaitu a nihna pawh a hloh.

Dutch tlangval Verstappen erawh chetsual chang nei mah se a ṭhatna thup theih a ni lo. Season kal laiah vawi li a chakna a ni, tun hnaiah a zawnin vawi thum chu a hmasa berah a thleng - car intlansiakna sang berah hian vawi 24 a chak tling ta chiah.

World champion Verstappen chuan, "Tlan sual chang ka nei, tlankawng sirah ka chhuak lek lek fo. Mahse tihsual lian tham ka nei lo, harsa taka hnehna chan theih hi a hlu a, elpui ṭha tak tak kara chak phei chu a hlu zual," tiin a sawi.

Red Bull driver pakhat zawk Perez pawhin a vawi khat nan Spain-ah podium a lawn, a sang zual pathum zinga a tel phak chu lawmawm a tih thu a sawi ve bawk. Championship table-ah pathumna ni bawkin, champion tum ngam zinga mi a ni ang.

Ferrari leh Red Bull ten season ṭha an hman laiin Mercedes erawh an la che fuh tawk lo. Spanish GP-ah pawh Hamilton chu a car ke (tyre) a chhia a, 19-naah a tlahniam hman. Huaisen takin bei let thei mah se pangana bak a ni phak tawh lo.

Britain tlangval Hamilton chuan, "Khatiang harsatna lian tham ka tawk chunga pangana nih chu lawmawm tak a ni," a ti. World champion vawi sarih ni tawh hian kuminah hnehna a la chang lo a, champion tur chuan insiamṭhat a mamawh hle.