Salih Ozcan-a'n Dortmund a zawm

Borussia Dortmund chuan Cologne midfielder Salih Ozcan an lalut a, kum 24 mi Turkey international hi euro maktaduai nga man vel ni tura ngaih a ni. Ozcan hian June 2026 thleng daih contract a ziak.

Ozcan hi Cologne, Germany-ah a piang a, an khaw club FC Cologne-ah bul a ṭan. Germany tan kum bithliah inelna hrang hrangah a khel chho a, amaherawhchu senior team-ah Turkey tana khelh a thlang ta zawk.

Turkey hi Germany youth team enkawl ṭhintu Stefan Kuntz-a'n a enkawl a, German coach hian Ozcan hi Turkey tana khel turin a ko a ni.

Ozcan hian season liam ta khan Bundesliga-ah match 31 a khel a, Axel Witsel thlakna tura ngaih a ni. Belgian midfielder Witsel hian Dortmund tan season li chhung a khelh hnuah German club hi a chhuahsan.

Dortmund sporting director Sebastian Kehl chuan, "Salih Ozcan hi Bundesliga-a player hmasawn ber zinga mi a ni a, Cologne tan defensive midfield-ah hna ṭha tak a thawk. Player chak ṭha tak a ni a, boruakah a ṭha a, team chakna tura theihtawp chhuah ṭhin a ni," tiin a fak.

Dortmund hi season thara Bayern Munich el pha turin an inthuam ṭha mek a, Erling Haaland chan mah se season thar atan player pali ngawt an la tawh. Chung player-te chu Niklas Sule, Nico Schlotterberck, Karim Adeyemi leh Ozcan te hi an ni.