Barcelona-in tlawm chungin season an khar

Spanish La Liga pawh season khar a ni ta a, Barcelona chuan an match hnuhnung bera Villarreal ngam lo chungin season an khar - an mikhual team lakah hian 2-0 in an an mualpho.

Villarreal tan Alfonso Pedraza leh Moi Gomez ten goal khat ve ve an khung a, Barca-in a chhanletna tur an neih loh avangin an tlawm - point 73 hmu chungin season an khar a, kum 14 chhunga point an hmuh tlem ber record an siam.

Hetihlai hian tun season Champions League semifinalist Villarreal erawh hnehna an chan avangin season tharah European football an khel dawn a, an inlanna tur erawh Europa Conference League a ni thung.

Pathianni Zan inkhel dangah Atletico Madrid chuan 2-1 in Real Sociedad an hneh a, Sevilla chuan 1-0 in Athletic Bilbao an hneh bawk - champion Real Madrid, Barca, Atletico leh Sevilla ten season tharah Champions League an khel ang.

Barca an mualpho
Xavi enkawlna hnuaiah nasa takin Barca an insiamṭha a, champion hial an sawi ri hman - mahse, season tawp lamah beisei an phak lo zui a, Nou Camp-a tlawm chungin season an khar.

Villarreal tan Dani Parejo-a assist chu Pedraza chuan minute 41-naah goal-ah a chantir a, minute 55-naah Barca-in loan-a an hawh Adama Traore a chesual zui.

Spanish winger ball pass sual zar zoin Moi Gomez chuan an goal hnihna a khung a, 2-0 a ni. Barca tan Frenkie de Jong chuan si phurh a sut ṭhenah a inngai a, mahse, offside vangin pawmsak a ni lo.

Barca-in point 73 hmu chungin season an khar a, champion Real Madrid chu point 13 zetin an phak lo - nomawi chawi an nei miah lo bawk a, season tharah Barca ṭha zawk fan-ten an beisei ang.

Atletico an chak
Premier League leh Serie A angin La Liga tawpna a 'hot' ve lo - Pathianni zana league match tawp ber khelh hmain champion a chiang tawh a, Champions League khel tur a chiangsa bawk.

Season thara Champions League khel tur tih inhre sa Atletico Madrid chu khualmualah an inthlahdah phah lo a, Real Sociedad chu 2-1 in an hneh.

Atletico tan hian Rodrigo De Paul leh Angel Correa ten goal khat ve ve an khung a, hun pek belh minute thumnaah Jon Guridi chuan khung ve mah se Sociedad tana result tidanglam turin awmzia a nei phak lo.

Real, Barca leh Atletico bakah La Liga aṭanga Champions League khel tur Sevilla an chak bawk a, an mikhual Athletic Bilbao chu minute 68-naa Rafa Mir goal hmangin an hneh.

Mallorca & Cadiz an him
Pathianni zan La Liga inkhela 'hot' ber chu tlak hlaua Real Mallorca leh Cadiz inlan a ni a, club pahnih hian him turin an match hnuhnung berah chak an mamawh ve ve - an mamawh ang takin an chak bawk.

Mallorca hian khualmualah Osasuna chu 2-0 in an hneh a, Angel Rodriguez leh Clement Grenier chuan goal khat ve ve khungin an team hi La Liga-ah an inhamtanpui thei hram.

Cadiz-in tla chiang tawh Alaves lakah rei tak chhung goal an khung thei lo a, hetihlai hian tla ve thei tho Granada-in Espanyol an inhnehtawkpui mek - Cadiz hian Alaves hi draw ta se Granada an him ang.

Mahse, Cadiz tan Anthony Lozano chuan minute 76-naah chakna goal a khung a, Granada-in inkhel lehlamah goal an khung bawk si loh avangin Cadiz an him.