Premier League-in VAR tihsual a pawm Spurs, Villa & Everton tawrhna = Cherries, United & Saints vanneihna!

Ningani zan Premier League inkhelah Tottenham Hotspur, Aston Villa leh Everton ten video assistant referee thutlukna an tuar a, thleng tur ang chu a thleng kim tawh. 

Hetiang boruak karah hian a tuartu te tana nat vawng vawngna tur thu thar a awm a, Premier League chuan Ningani zana VAR thutlukna te hi a dik loh vek thu an sawi - an tihsual an pawm tihna a ni!

Manchester United-in 3-0 in Aston Villa an hneh a, Bruno Fernandes chuan penalty aṭangin goal hmahruai a khung. Southampton chuan 1-1 in Everton an inhnehtawkpui a, Saints tan James Ward-Prowse chuan penalty a pet goal lo. 

Tottenham Hotspur-in goal khung loin Bournemouth an inhnehtawkpui a, penalty hmuh phu mah se an hmu lo. United leh Saints-in an phu loh penalty an hmu a, Spurs-in an phu angin an hmu lo thung. 

Cherries nena an inkhelah Harry Kane-a'n goal khungna remchang a nei a, mahse Bournemouth striker Joshua King chuan English striker hi a nam thlu. Penalty tur a ni a, referee Paul Tierney-a'n penalty-ah a ngai lo thung. 

Video assistant referee inrawlhna tur niin a lang a, mahse VAR official Michael Oliver chuan inrawlhna turah a ngai lo. Oliver hi kar hmasaa Spurs-in 3-1 a Sheffield United an ngam loh ṭuma Kane-a goal khung pawmsak lotu VAR official kha a ni a, Pathianni zana Spurs-in Arsenal an mikhual hunah referee a ni dawn bawk. 

Tottenham manager Jose Mourinho chuan, "Sheffield laka VAR official tho kha zanina kan video referee a ni. Khawvela mi zawng zawngin penalty a ni tih an hria a, khawvel mi zawng zawngin tia sawi hi ka ti tak tak a ni. 

"Sheffield ang tho khan man of the match chu player a ni lo. Sheffield lakah kha chuan keimah leh player-te pawh dem theih kan ni a, tun ṭumah erawh a theih loh," a ti a, an chak zawh loh chhan chu match official an nih thu a sawi. 

Villa tan Trezeguet-a'n post a tih per hnu lawkah United tan Fernandes chuan penalty a hlawh chhuak. Portuguese midfielder hian Villa penalty box-ah ball vir luh pui a tum a, Villa defender Ezri Konsa ke a rap fuh. 

Midang ke raptu zawk hi nat hmel takin a tlu a,  referee Jon Moss chuan penalty spot kawk turin ngaihtuahna a seng rei lo. VAR chuan Moss-a thutlukna a pawmpui a, ennawn erawhin penalty a ni lo tih chiang takin a lang. 

Premier League chuan, "Thutlukna dik lo a ni. VAR khan Moss-a thutlukna dik lo kha a sut tur a ni a, mahse a sut si lo. Fernandes zawk kha a 'foul' a ni," an ti - awmzia a awm tawh lo.

Villa boss Dean Smith chuan, "Moss khan tisual thei a ni a, VAR erawhin eng nge a en bik ka hrethiam thei lo," a ti a, United boss  Ole Gunnar Solskjaer chuan, "Penalty ngei a ni. Fernandes khan Zidane, Maradona angin ball a virpui a, mahse player khan a rawn tawk fuh ta a ni," a ti ve tlat.

Ningani zan Premier League inkhel dangah Everton chu 1-1 in Southampton nen an inhnehtawk a, he inkhelah hian Everton-in sawisel theih takin penalty an chawi. 

Saints captain James Ward-Prowse chuan Everton midfielder Andre Gomes-a ke khai chhuah chu va nekin a tlu a, penalty a hlawh chhuak. Mahse, English midfielder hian a hun ṭha neih hi goal-ah a chantir thei lo. 

Ningani zana thutlukna dik lo tuar zingah Everton an vannei ber a, Ward-Prowse hian crossbar tih perin Saints player zinga Premier League-a a zawna penalty pet goal lo hmasa ber a ni! Everton boss Carlo Ancelotti chuan, "Referee kha ka team-te ang mai an ni a, an hna an thawk ṭha lo hle a ni," tiin a sawi!