Pep-a'n season thar a thlir

Manchester City manager Pep Guardiola chuan Premier League nomawi Liverpool laka an chan fel tawh avangin season thar a thlir lawk a, season duhawm tak an hman theih a beisei thu a sawi lawk.

Pep hian coach hna a thawh hnuah Barcelona, Bayern Munich leh City chiah a la enkawl a, Etihad Stadium-ah season thar a la cham dawn avangin a coaching career-a a vawi khat nan club pakhatah season nga a cham ve dawn. 

Spanish manager chuan, "Chona a ni a, eng nge thleng dawn chu kan la hria ang chu. Keimahah chuan season duhawm tak kan hman theih beiseina leh inrintawkna a awm a ni," a ti. 

City hi tun season Premier League-ah vawi kua an tlawm tawh a, champion Liverpool chu point 23-in an phak lo mek. Pep-a 'level' ngaihtuahin dinhmun duhawm tak a ni lo. Pep chuan, "United-in hma an sawn a, Chelsea pawhin hma sawn dawn. Blues phei hi chuan player thar an lei der tawh a, an la lei belh bawk ang. Kumtinin league hi chu a harsa ziah a ni. "Tun season-ah chuan kan ban phak rual lohin team pakhat an awm a, kan inkar kan sawr zim phawt hi a pawimawh. Kan hnuaiah point 11, 8 vela min phak lo an awm ve tho bawk a, point tam tak a ni. Liverpool hnaih zel kan tum ang a, kan hnuaia awm te hlat reng kan tum bawk ang," a ti a, tun season-ah champion thei lo mah se a theih anga sanga season khar a tum. Manchester City hian zanin dar 12:30-ah Premier League match khel turin tlak hlau Brighton & Hove Albion chu khualmualah an lenchilh dawn a, a awlsam lo ang.