Inter Milan chak zo lo Juve an champion chiang?

Serie A khelh hmabak match pariat ṭheuh an la nei a, point sariha sang fal Juventus chu a zawna a vawi kua nan an champion leh ngei dawn niin a lang. Turin club hian zanin dar 1:15 hian Allianz Stadium-ah pathumna Atalanta an mikhual ang.

Ningani zan khan Inter Milan chu an mikhualna ramah Verona nen 2-2 in an inhnehtawk a, manager Antonio Conte naute hian Old Lady an phak lohna chu point 10 lai a nih tak avangin an tan nomawi beiseina a thamrala ngaih a ni.

AC Milan lakah goal hniha hma an hruaina an hum thei lo a, mualpho takin 4-2 in an tlawm. An chak loh hnuah Juventus manager Maurizio Sarri chuan an tlarhnung phui lo an siamṭhat nghal tur thu a sawi.

Juve mikhual tur Atalanta hi season kal laia Serie A goal khung hnem ber (85 goals) an ni a, tun hnaia tlarhnung pawp Juve tan fimkhur a ngai dawn. Gian Piero Gasperini naute hian tun season league match bikah chuan vawi hnih chauh goal khung loh an nei.

Italian manager Sarri chuan, "Khelh ṭhat tluan lai tak pawhin chetsual theih a nih zia chu Milan lakah khan kan hre chiang. Nuamsa takin point thum kan hmu dawn emaw tih hnuah a chak lo zawkah ka ṭang, kan tihsual aṭang khan zirlai thar kan zir chhuak tawh," a ti.

Cristiano Ronaldo leh Paulo Dybala te an awm avangin Juve hian goal chu an khung leh ngeiin a rinawm, point thum hmu tur chuan an tlarhnung an remphui a ngai dawn. Rawlthar Matthijs de Ligt-a'n tihsual a neih loh a pawimawh ang.

Antonio Conte-a'n Inter Milan din thar leh a tum a, sum tam tak senga player la lutin season pawh an ṭan fuh hle. Season chawhnu lamah erawh an zuih hle thung, Covid-19 len hnua league an khelh chhunzawm leh meuh chuan nomawi beiseina a chau tawh viau.

Conte chuan, "Inpekna leh ṭhahnemngaih kawngah chuan ka naute demna tur ka nei lo. An theihna sang ber an hlan, kan khingpuite kha an che rangin min nawr buai hle a, a harsa ve bawk a ni. "Chhiarkawp dan chuan nomawi kan beiseina a la bo lo, beiseina tlemte chauh pawh kan neih chhung chuan kan bei chhunzawm zel ang," a ti. Inter hi palinaah an tlahniam tawh a, Juve bakah Lazio leh Atalanta te chu an tan el tur hautak vek an ni.

Inter Milan hian July 13, Thawhṭanni zanah Torino an mikhual leh dawn. Torino hi 15-na nilai an ni a, season thara Serie A khel chhunzawm turin an la him chiang lo, point mamawh an nih avangin awlsam taka nuai liam mai theih an ni lo ang.