Goal riat a lut, a la tawp lo ; Man City 5 - 3 Monaco
Eithad Stadium-ah Champions League last 16 hriatreng tlak phochhuah a ni a, Manchester City-in an mikhual Monaco 5-3 in an hneh.
Thawhlehni zanah striker thiam rual an inlar a, Sergio Aguero-a'n City tan goal hnih a khung a, hetiang zat tho hi Monaco forward Radamel Falcao-a'n khung. Colombian striker goal inkarah hian French rawlthar duhawm Kylian Mbappe-a'n a pet goal bawk.
City goal hmasa ber hi Raheem Sterling a khung a ni a, English forward siamsaktu Leroy Sane-a'n goal ngana a khung. Falcao laka penalty chawitu John Stones-a'n City goal lina leh hmahruaina a khung. March 15, Nilaini zanah Monaco khelmual Stade Louis II-ah second leg khelh a ni ang.
A = Aguero
Argentine foward Aguero hi a dam ṭha a nih phawt chuan Manchester City starting eleven-a tel ngei tura ngaih a ni
ṭhin a, Gabriel Jesus awm hnuah Pep Guardiola-a'n a ngaihdan a thlak. Amaherawhchu Aguero-a'n goal hnih a khung takah chuan a hming ṭantira 'A' a awm ang bawkin Spanish coach hian inkhel bul ṭantur a ngaihtuah rualin Aguero hming a lang chho leh thei tawh ang.
City hi tlarhnungah buai deuh mah se Aguero erawh a thawkrim a, Monaco defender-te tan a hnawksak tluan. Argentine forward hi first half-ah referee-in penalty pe loin yellow card a pe thung a, Monaco keeper Danijel Subasic-a'n a khawih fuh avangin City ṭantu tan thutlukna tawrh thiam har tak a ni ngei ang.
Aguero hian 1-2 a nih laiin keeper Subasic tihsual zarah siphurh sutna goal a khung a, City forward hian 2-3 a nih hnuah siphurh sutna atan a volley goal leh bawk. Argentine forward hian goal ngana a luh theih nan Sane khung tur a siam sak. Monaco-in khualmualah goal thum lai an khung avangin German forward-in goal khat an belh leh hram hi City tan a pawimawh hle.
Falcao a la special
Goal khung vangin Falcao-a'n hming a chher a, Premier League-ah erawh a hlawhchham. Colombian striker hi Manchester United-ah kalin league match 26-ah goal li chiah a khung a, Chelsea-ah season khat kal lehin league match 10-ah goal khat chiah a khung bawk.
Monaco kawr hain Falcao-a'n English club a hmachhawn a, Fabinho cross chu a thiam dan takin Colombian striker hian a tauh goal. Falcao hian goal hnihna khung turin Stones a bum a, City keeper Willy Caballero chu cool takin a pet khum.
United leh Blues lamin rinna an ngah ngam loh hnuah Falcao-a'n talent nei ṭha bik a nihzia a lantir a, amaherawhchu 3-1 a nih theihna tura a penalty hlawhchhuah a khung lo erawh result danglamna chhan a ni.
En bik tlak Mbappe!
Kum 18-a upa Kylian Mbappe chuan Monaco tan inkhel bul a ṭan a, French player zinga Champions League-a bul ṭan naupang thei pathumna a ni. Mbappe hi Arsenal legend Thierry Henry nen an khaikhin tawh a, kum 18 an nih laia an theihna en chuan France forward hlui Henry ngei pawhin Monaco forward hi amah aiin a ṭha zawk tih a pawm.
Mbappe hian a goal khung a, Karim Benzema (17y 352d) hnua French player Champions League-a goal khung thei naupang ber a ni. Portuguese midfielder Bernardo Silva-a'n theihna sang tak a nei tih a lantir a, kum 22-a upa Silva hi French forward Mbappe ang thoin a hmuhnawm.
A la tawp lo
Manchester City manager Pep Guardiola chuan, "Monaco kan tlawh hunah chuan goal tam tak khung tumin kan kal ang. Khualmualah goal kan khung lo a nih ngat chuan kan tla ang," tiin quarterfinal an la thlen loh thu a sawi.
Monaco boss Leonardo Jardim chuan, "Kumin Champions League inkhelah chuan a hmuhnawm ber zinga mi an ni. Penalty kan hlah kha inkhel tidanglamtu a ni a, amaherawhchu kan mualah minute 90 kan la khel dawn, a la tawp lo," tiin beisei an la neih thu a sawi.
French club hian tun season inelna hrang hrangah goal 111 an khung tawh a, Europe-a league sang panga club zingah goal la khung tam ber an ni.