Bagan chak zo lo
AFC Cup playoff khel tura zin chhuak Mohun Bagan-in khualmualah hnehna an chang zo lo a, Maldives club ṭha Club Valencia nen goal khat ve ve khungin an inhnehtawk. Mariners hian inkhel ṭan aṭanga minute rukna lekah striker chhuanvawr Darryl Duffy hmangin goal hmahruai an khung a, goal dang a luh lawk loh avangin Male khawpuiah Kolkata club hi an chak dawn niin a lang hman.
Mahse, minute 71-naah Bagan defender Subashish Bose chuan penalty area-ah a kutin ball a khawih fuh palh a, Maldives club-in penalty an hlawhchhuah phah. Penalty pet turin Godfrey West Omodu a pen chhuak a, Nigerian striker hian an si phurh sut nan a khung. Hun tawp thleng goal dang a luh tawh loh avangin team pahnih hi goal khat ve veah an lungawi a ṭul a, second leg hi February 28-ah Rabindra Sarobar Stadium, Kolkata-a khelh leh tur a nih avangin khualmuala goal khungtu Bagan dinhmun a ṭha zawk.
I League nomawi chawi tum Bagan hian inkhel hautak an hmachhawn zawn deuh avangin Maldives-ah hian players pawimawh Jeje Lalpekhlua, Debjit Majumder, Pritam Kotal, Pronay Halder, Souvik Chakraborty leh Sony Norde bakah coach Sanjoy Sen-te zin zingah an tel lo a, assistant coach Shankarlal Chakraborty kaihhruaina hnuaiah players khelhna hmun chang tam lo ṭhenkhat inlanna hun pek an ni.