United kan barakhaih thei ang - Cedric

Southampton right back Cedric Soares chuan EFL Cup final-ah Manchester United an hneh theih a rin thu a sawi. Kum 25-a upa defender hi Euro 2016 final-a inelna thlengtu France barakhaihtu Portugal-ah khan player pawimawh a ni.

Saints defender Cedric chuan, "Euro-ah khan tumahin Portugal an chak kan ring lo a, Saints-ah pawh a danglam lo. Tumahin Wembley Stadium kan thlen theih an ring lo. Nuam ti takin kan khel tur a ni a, chutihrualin kan chak tur a ni. Hetiang hun ṭha hi thil thleng zen zen lo a ni," tiin United kuta nomawi hlan mai a tum lo.

Portuguese defender chuan sawi chhunzawmin, "Kum 10 a liam hnua inchhir leh turin kan khel tur a ni lo. Portugal-ah khan hetiang hun hi kan tawng tawh a, EFL Cup ai chuan Euro chu a lian zawk. Chuti chung chuan nomawi chawi turin theihtawp kan chhuah tur a ni a, final-ah chuan mawi taka khelh a pawimawh lo - chak a tawk," tiin nomawi chawi ngei an tum thu a sawi.

Southampton hian final lut turin semifinal-ah Liverpool an hneh a, kum 1979 hnua League Cup final an thlen lehna hmasa ber a ni. EFL Cup final hi Pathianni zan dar 10:00 khian Wembley Stadium-ah khelh a ni ang.