Swiss Indoors khel rei tur Federer
Roger Federer chuan kum 2019 thleng Swiss Indoors khel turin contract a ziak a, an chenna khua Basel-a neih ṭhin he inelna tana kum thum daih contract a khelh zawh meuh chuan Federer hi kum 38-a upa a lo ni tawh ang.
Kum 35-a upa Federer hi nikum khan a hliam vangin season chawhnu lamah a inkhel tawh lo a, kumina a tournament hmasa ber atan Australian Open-ah a inlan a, final-ah Rafael Nadal hnehin a vawi 18 nan Grand Slam nomawi a chawi.
Swiss thiampuipa chuan, "Basel-a inkhelh hi kum tina ka thil tum leh ngaihpawimawh berte zinga mi a ni ṭhin," a ti. Federer hian hliam a nei a nih pawhin inelna liana player langsar hneh thei tura tumruhna leh beiseina a hloh ngai loh thu a sawi tel bawk.
Federer hian kum 1998 khan a vawi khat nan Swiss Indoors a khel a, kha tih hun lai khan kum 17 chauha upa niin Andre Agassi chu straight set in a ngam lo - he mi hnuah vawi sarih a champion tawh thung a, a champion hnuhnung ber chu 2015 kha niin final-ah Nadal a hneh.
A kum a tam deuh tawh a, inelna zawng zawngah a inlan thei tawh lo. Australian Open hnuah Federer hian inelna a la hmachhawn leh lo a, kar leha khelh tur Dubai Duty Free Championships-ah a inlan leh chauh ang.