Germany-ah Atletico an tlangnel

Atletico Madrid-in Bayer Leverkusen khelmualah mikhual awmdan mawi lantir ai chuan tlangnel an thlang zawk a, Champions League last 16 first leg-ah German club hi 4-2 in an hneh - quarterfinal lut turin an dinhmun a ṭha hle.

Mikhual team tan Saul Niguez, Antoine Griezmann, Kevin Gameiro leh Fernando Torres ten goal khat ṭheuh an khung a, Leverkusen tana Karim Bellarabi leh Atletico defender Stefan Savic-a'n an lama a tih luh chu German club tan beiseina tlem a la awm tih lantirna mai chauh a ni - second leg hi March 15 zanah Vicente Calderon-ah khelh leh a ni dawn.

Saul-a goal ropui

BayArena-a inkhelah goal hmu turin nghah rei a ngai lo a, goal hmasa ber hi goal ropui a ni nghal bawk - inkhelh

ṭan aṭanga minute 17-na lekah Saul Niguez chuan Leverkusen penalty area-ah mawi taka ball a lakluh hnuah 'class' zetin a khung a, goalkeeper Bernd Leno a inkhawh sang viau nachungin a ban pha lo.

Mikhual team an phur lak­lawh a, goal an khung aṭanga mi­nute riat hnu lawkah an goal hnihna an khung chhunzawm. Kevin Gameiro-a'n Leverkusen defender pahnih a bum phar hnu­ah ven loha awm Antoine Griez­mann tan ball a pe a, French forward tan khung loha mawi lo a ni.

Goal a sur

First half-ah Atletico-in goal dang an khung chhunzawm loh avangin Leverkusen an vannei a, minute 48-naah an vanneihna chhawr ṭangkaiin Karim Bellarabi chuan an si phurh a sut ṭhen - he goal luh theihna tura Leverkusen player-te ball inpe kual vel chu hmuhnawm tak a ni.

Mahse, German club hlim chhung a rei lo. Khel ṭha tak Gameiro-a'n ama penalty hlawh­chhuah chu Atletico tan a khung chhunzawm. Lever­kusen-in minute 67-naah Stefan Savic own goal chhawr ṭangkaiin an si phurh sut ṭhen leh mah se Atletico tan substitute Fernando Torres chuan minute 86-naah ṭha zetin a tauh lut ve leh a, mikhual team an chungnung.

Europe ngainatu Atletico

Diego Simeone-a nauten sea­son thum chhung chu a zawn­in Champions League quarterfinal an lut tawh a, heng zinga vawi hnihah hian final an lut - Europe club a thiam pariat zinga tel turin an dinhmun a ṭha leh tawh hle.

Bayer Leverkusen goal­keeper Leno chu a team chhan­damtu a ni a, German keeper hian Griezmann goal khung ngei tur nia ngaih chu ṭha zetin vawi hnih lai a dan sak. Brazilian defender Wendell chuan Felipe Luis ball cross pet chhuah a tumna lamah bar a pet per a, Leverkusen tlarhnung an talbuai tih hmuh hmaih rual a ni lo.

Atletico fan-te tana hriat nuam tur chu an fapa rang­kachak Torres-a'n tun hnaiah a chet ṭhat a chhawm nung zel hi a ni a, Liverpool leh Chelsea striker hlui hian Europe inelnaah goal 41 zet a khung tling ta.

Inzir ngai Leverkusen

Leverkusen-in season hma­saah Bundesliga pathumna dinhmun luahin Champions League an khel a, group stage-ah hneh loh tawng loin last 16 an lut chhunzawm. Atletico an hmachhawn zanah pawh German club hi an khel chhia a ni hran lo a, 62% ball chang chunga goal hnih khung hi chakpui tham niin lang mah se an tlarhnungin inzir belhna tur an la ngah zia pholanna remchang mai a ni.

German manager Roger Schmidt-a'n kum 17-a upa midfielder Kai Havertz chu a vawi khat nan Champions League inkhel bul a ṭantir a, Champions League 1999 final khelh hnua piang zinga he inelnaa inkhel bul ṭan hmasa ber a ni. Mahse, a match hnu­hnung pangaa assist pathum neitu Havertz-a tan Champions League meuh chu a sang lutuk rih niin a lang a, a khel ṭha tawk lo. Kum 20-a upa Julian Brandt erawh a entlak hle.

Leverkusen-in inkhel an thlirkir chuan Slovenia inter­national Kevin Kampl-a'n inkhel ṭantir lama shot a neih Moya-a'n ṭha taka a lo dan sak kha an ui vawng vawng ang a, Atletico khelmualah an tho leh lo a nih chuan Javier Hernandez ball pet goal line bul aṭanga Felipe Luis-a'n a lo pet chhuah hman pawh kha an sawi rei khawp ang!

Eng nge an sawi?

Atletico Madrid boss Diego Simeone chuan, "Kha aia tam zawk kha goal khung thei kan ni a, mah se an goalkeeper khan vawi hnih ngawt ropui tak takin Griezmann-a goal khung tur a dan sak a ni. Khualmuala kan khelh chuan inrintawkna neih a ngai ṭhin a, chu inrintawkna chu kan neiin ka hria. Vei lam sir aṭanga nawr khan an defender te kan ti buai thei tih kan hria a, kan ruahman ang taka khel chhuakin result duhawm tak kan hlawh chhuak a ni," a ti.

Bayer Leverkusen boss Roger Schmidt chuan, "Atletico-in season thum chhung leka final vawi hnih an luh theih chhan chu kan hmaah khan chhawpchhuahin a awm a ni. Counter attack-a an ṭhat zia kan hre reng a, mah se inveng zo loin first half-ah goal hnih kan chhuah nghal ringawt. Theihtawp chhuaha bei tura kan inpeih zia erawh kan pholang a, hun tawp lam minute 15 kha kan khel ṭhain fan-ten min thlawp tlat bawk a ni," a ti a, a player-te a sawisel duh lo.