Goal 100 beisei lotu Theo Walcott
Theo Walcott chuan, Arsenal tana goal 100 a khung tling ta mai chu mak a tih thu leh a beisei phak loh thil thlen chin chu sawifiah thiam harsa khawpa lawmawm a nih thu a sawi chhuak.
England interntional hian Thawhṭanni zan khan Nacho Monreal thawhrah sengin Sutton United lakah Arsenal goal hnihna a khung a, Gunners tana goal 100-na khung pahin FA Cup quarterfinal a hruai thleng.
Kum 27-a upa Walcott chuan, "Rim taka thawh leh theihna zawng zawng nena inkhelh hi ka tih ṭhin dan a ni a, Arsenal tana goall 100 khung tling thei zinga lan erawh ka suangtauh phak ngai lo. A ropui ka ti a, sawifiah vak dan pawh ka thiam lo. Hetiang hun hlimawm bik tawn hi chu a nuam takzet," a ti.
Southampton aṭanga Arsenal zawmtu Walcott hian North London club tan hian inelna hrang hranga goal 100 khung turin match 370 a mamawh a, heng zinga tam takah hian substitute bench aṭanga a tlan luh chang a awm.
Walcott chuan, "Ka thlen chin hi a ropui ka ti a, chutihrualin duh tawk mai erawh ka la tum lo. Goal ka khung theih nana ka khelh pui mek leh ka khelhpui tawh ṭhin zawng zawngte chungah ka lawm hle," tiin mimal thiam vang chauh goal khung ngawt theih a nih bik loh thu a sawi.
Arsenal tana goal 100 khung tling thei player 18-na Walcott hian tun hmain chanchin danglam tak a lo nei tawh bawk. England manager Sven-Goran Eriksson chuan 2006 World Cup-ah khan khatihlaia Gunners tana competitive game la khel miah lo kum 17-a upa Walcott chu squad-ah a lo telh tawh - inelna takah erawh khelhna hun a siamsak lo.