Spurs tan thawhlehna hun Final tluk zeta pawimawh a ni - Pochettino
Tottenham Hotspur chuan kar hmasa khan chak tura rinkai ni chungin Belgium an pan a, Gent lakah 1-0 in an tlawm haw. Zanin dar 1:35 hian Wembley Stadium-ah Spurs hian an lo mikhual ve thung dawn a, Mauricio Pochettino naute hian Europa League Round of 32 paltlang turin goal khung an mamawh.
Tottenham manager Pochettino chuan an inkhelh tur chu final ang mai a pawimawh a nih thu a sawi a, Champions League-a beisei phak lo manager hian Europe-ah an theihna sanzia lantir a duh avangin last 16 luh an tum tih a chiang - Gent tan an goal neihsa humhim tum ngawr ngawr a fuh kher lo ang.
Spurs an harh
Tottenham hian Premier League-ah Liverpool 2-0 in an hneh lo a, Europa League-ah Gent lakah si khat faiin an tlawm zui bawk. Pochettino naute hi season dang ang bawkin hun pawimawhah an zuih ral leh dawn niin a lang hman. Mahse, Spurs hian kartawp FA Cup fifth round inkhelah Championship club Fulham 3-0 in an sawp a, striker rinrawl Harry Kane chuan hattrick a siam.
Argentine manager Pochettino chuan, "Gent kan hneh loh hnu khan kan inhmukhawm a, chu chuan Fulham lakah rah
ṭha a chuah nghal. Europa League lamah round sang zawk luh kan tum a nih chuan theihtawp kan chhuah a ngai dawn a, kan theihna zawng zawng kan hlan dawn bakah fan-te puihna kan mamawh nasa hle ang," tiin a sawi.
Tottenham hian White Hart Lane an sak ṭhat mek avangin kumina European game-a an home match khelhna atan Wembley Stadium an hmang. Spurs hian England-a khelmual hmingthang berte zinga pakhat hi an hmang thiam tawk lo.
Champions League match thum an khelh aṭangin vawi khat chiah hnehna an chang a, AS Monaco leh Bayer Leverkusen te an hneh lo. French Ligue 1 hmahruaitu leh Bundesliga club te hi an tluk loh avangin Champions League group stage an paltlang zo lo a, Europa League an khelh zui takna chhan pawh a ni.
England international striker Kane chuan, "Season lehah pawh Wembley Stadium-ah hian home match kan khelh a la ngai chhunzawm mai thei, chuvangin kan hmanthiam a ngai. Kan inkhelh tam chuan kan hmangthiam zel ang tih ka ring. Gent lakah pawh hian White Hart Lane-a kan khelh ṭhin dan ang bawka ṭhain kan khelh ngei a ngai ang," tiin mipui 90,000 lenna stadium hmanthiam a ngaih thu a sawi.
Gent an zam lo
Gent boss Hein Vanhaezebrouck chuan, "Wembley Stadium hi mikhual tana inkhelh harsatna hmun leh hnehna chan harstana hmun tiin an sawi ṭhin. He thu hi keni pawhin kan hria a, inbuatsaihna kan neih ṭhat phah. Ka naute hian boruak sang leh rit tak tak hnuaiah football an khel tam ve tawk tawh a, second leg-ah hian kan buai thut ka ring lem lo," tiin khualmuala inkhel tur ni mah se an zam loh thu a sawi.
Gent hian tun season-ah beisei angin an khel chhuak rih bik lo. Belgian league-ah match 27 an khelh tawh aṭangin point 41 chiah an la hmu a, league table-ah pariatna an ni - goal 34 khungin an lamah 32 a lut tawh thung a, an ropui rih lo hle.
Zanin Inkhel Tur
Osmanlispor 9:30 PM Olympiakos Piraeus
Ajax 11:30 PM Legia Warszawa
Zenit 11:30 PM Anderlecht
Roma 11:30 PM Villarreal
Besiktas 11:30 PM Hapoel Be'er Sheva
Genk 1:35 AM Astra
Kobenhavn 1:35 AM Ludogorets
Shakhtar Donetsk 1:35 AM Celta de Vigo
Tottenham Hotspur 1:35 AM Gent
Sparta Praha 1:35 AM Rostov
Fiorentina 1:35 AM Borussia Monchengladbach
Olympique Lyonnais 1:35 AM AZ Alkmaar