A bul ṭan nan Angelique Kerber chak
German nula Angelique Kerber chuan a hnampui Mona Barthel chu 6-4, 6-3 a hnehin Dubai Duty Free Tennis Championships second round a paltlang. Thawhlehni zan inkhelah seeded pakhatna Kerber hian harsatna lian a tawk lo a, Serena Wiliams lak aṭanga world number 1 nihna chhuhsak turin kawng dik a zawh leh mek.
World number 2 Kerber hian nikum khan Grand Slam nomawi pahnih chawiin season duhawm a hmang a, kuminah erawh tournament pali a khelh tawhah a la champion lo.
Kum 29-a upa Kerber chuan, "Ka khelh danah ka lawm, ka sawi tawh angin ranking aiin khelh hmabak zel a pawimawh zawk. Ka taksa a fit ṭha a, ka ball vuak a dik bawk," tiin a sawi.
Inkhel dangah beisei loh result kan hmu, seeded pahnihna Karolina Pliskova chu Kristina Mladenovic lakah 6-2, 6-4 in a chak lo. Agnieszka Radwanska chuan Elise Mertens 6-3, 6-2 in a hneh a, Garbine Muguruza, Elina Svitolina, Samantha Stosur leh Elena Vesnina ten hnehna an chang bawk.