Sevilla hmaa tlawm Foxes beisei a bo lo

Leicester City-in Cham­pions League last 16 first leg-ah Sevilla ngam lo mah se khualmualah goal an khung miau avangin an beiseina erawh a la bo lo. Nilaini zan khan Lei­cester hian khualmualah Sevilla an lenchilh a, 2-1 in an tlawm haw. March 14 zana second leg an khel leh ang.

Foxes tan Jamie Vardy chuan goal awmchhun a khung a, England international hian match kua zet goal a khung loh hnuah a khung ve leh ta - Foxes fan-ten beiseina an nei thar leh ngei ang.

Spain-a inkhelah Sevilla tan Pablo Sarabia-a'n goal hmahruai a tauh luh hnuah penalty pet goal lotu Joaquin Correa chuan a tihsual thup nan an goal hnihna a khung. Foxes an beidawng duh lo a, Jamie Vardy chuan an si phurh sut ṭhenin Claudio Ranieri naute hnenah 'beiseina' a la awm tih a lantir.

Foxes an tho?
Premier League champion Leicester-in season hmasaa an thil mak tih an chhawm nung hleithei lo a, tun season-a league match 25 an khelh tawhah vawi 14 lai an tlawm tawh. Premier League aṭang­a tla thei dinhmunah an ding mek a, League One club Mill­wall ngam loin FA Cup aṭang­in hnawhchhuah an ni a, Champions League chiah hi an hmingchhiat thairehna tura beisei an neih ngamna awmchhun a ni ta.

Sevilla an hmachhawn hma­in Foxes manager Claudio Ranieri-a'n an khelh dan chuan inelna hrang hranga an hmabak thui taka a hril tur thu a sawi a, a naute chu sipai huaisen ang maia rilru paukhauh pu turin a fuih bawk. Inkhel

ṭantir lamah Leicester hi talbuai mah se season hmasaa an rilru huaisenna ang kha hmuh turin a awm leh tawh a, goal hnih zet an chhuah hnuah pawh beidawng duh loin an beidawn duh loh 'rah' an hmu a, khualmualah goal khat hlu tak an hlawh chhuak - Foxes tak tak an inlar ṭan a nih pawn a mak lo ang.

Chhandamtu Vardy
December 10-a Manchester City laka hattrick a siam hnua goal khung leh tawh lo Jamie Vardy-a'n Erope-ah goal a khung a, English striker hian a thiam a la theihnghilh lo tih a pholang. Kum 30-a upa striker hian inkhelh chhung zawngin vawi 25 chauh ball khawih fuh mah se a pawimawh ber goal a khung miau a, Foxes fan-ten a chungah beiseina thar an nei leh tawh ang.

Leicester-in beisei an la neih ngam chhanah goalkeeper Kasper Schmeichel hming lam tel loh a harsa. Danish keeper hian game thlak danglam thei tur Correa penalty pet a dan mai bakah Argentine attacking midfielder hi vawi khat dang a ti beidawng bawk a, Sergio Escudero shot a lo dan hman pawh Premier League champion keeper tih atana mawi reng a ni.

Foxes rilru huaisenna piah lamah an vanneihna hmuh hmaih theih a ni lo bawk a, La Liga nomawi beisei ngam Sevilla hian Vitolo leh Adil Rami hmangin vawi hnih ngawt woodwork an tih per.

Beisei a bo lo
Leicester manager Claudio Ranieri chuan, "Keini aiin team ṭha zawk an ni tih kan hria a, ball inpek kual an thiam zia phei chu kan hriat sa a ni. An theihna an pholang a, keini chuan kan rilru huaisenna kan pholang thung. Beiseina nei tlat chungin kan khel a, chu chu ka lawmna ber pawh a ni. Kasper Schmeichel khan a khel ṭha takzet a, midang pawhin an khel ṭha. Kan tana pawimawh ber chu kan khelh dan anga khelh chhunzawm zel hi a ni," tiin a naute khelh danah a lawm thu a sawi.

Sevilla manager Jorge Sampaoli chuan, "Champions League game-ah hetiang taka inthlauh hi ka lo beisei ngai lo. Chance tam tak kan insiam miau avangin ka naute khelh danah ka lawm a, kan result erawh kha aia ṭha zawk kha kan phu miau avangin lawmna tur ka hmu lo," a ti a, goal tam zawka chak theiah a inngai.

Inkhel chhehvel
• Leicester City-in inelna hrang hranga an match hnuhnung 22-ah vawi hnih chiah goal chhuah loh an nei.
• Foxes hian first half chhung zawngin vawi khat pawh target-ah shot an nei lo a, an match hnuhnung paliah first half-a target a shot an neih zat chu vawi khat chiah a ni.
• Pablo Sarabia-a'n a vawi khat nan Sevilla tan match hnih chhung a zawnin goal a khung.
• January-a Sevilla pan Stevan Jovetic-a'n match riat khelin goal sarihah a inrawlh a, vawi thum goal khungin vawi li a ṭhiante tan assist a nei tawh.
• Jamie Vardy-a'n Leicester tan minute 758 zet goal a khung loh hnuah a khung ve leh ta.
• Vardy goal khung kha minute 380 khelmuala hun a hman chhunga target a shot a neih hmasak ber a ni bawk.