India U17-in Coach thar nei hnai

All India Football Fe­deration (AIFF) chuan Nicolai Adam hmunruak luah turin Portugal U-21 coach Luis Norton de Matos an lalut dawn.

March thla tawp lam hian Mumbai khawpuiah interview neihpui leh phawtin ruahman anga engkim a kaltluan chuan official-a puan a ni ang.

India rama FIFA U17World Cup 2017 khel tur India team enkawl tur hian khawvel hmun hrang hrang aṭangin coach 75 zetin dilna an thehlut a, AIFF advisory committee lam chuan mi pariat thlang chhuakin video call hmangin interview neih a ni.

Hming langsar Manchester City boss hlui Stuart Pearce, RCD Mallorca assistant manager ni lai Oscar Bruzon, AIFF technical director hlui Colm Toal leh Uruguay international hlui Edgar Borges karah Luis Norton de Matos hi a langsar ta ber a ni.

AIFF general secre­tary Kushal Das chuan, "Luis hi kan duh ber a ni a, March 27-ah AIFF president Praful Patel leh sports secretary Injeti Srinivas te hmaah interview neiin engkim a kal tluan chuan coach a ni ang. Beisei anga thil a kaltluang ta lo a nih pawhin midang koh tur kan nei sa a ni," tiin India U17 chuan coach thar an neih thuai tur thu a sawi.

Player a nih laia Por­­tugal tana vawi nga in­lan tawh Luis hian kum 1989 aṭang khan coaching luhchilh ṭanin tawnhriat a ngah tawh hle a, Benfica B team enkawl tawhin Sporting Lisbon-ah director of football dinhmun a lo luah tawh bawk.

Kum 63-a upa coach hi Portuguese Foot­ball Federation (FPF) chuan AIFF hmaah an fak hle nia sawi a ni a, rawlthar chher lama hming ṭha tak coach hian a players chherchhuah zingah Benfica defender Victor Lindelof, AS Monaco midfielder Bernardo Silva, Bayern Munich midfielder Renato Sanches leh Paris Saint Germain winger Goncalo Guedes te chu hming langsar an ni.