Anfield-ah Lallana cham zel dawn

Liverpool midfielder Adam Lallana chuan Anfield-ah kum 2020 thleng cham turin contract thar a ziak a, a contract thar hi a ṭul dan a zira kum khat dang pawhsei theih tura ruahman niin kar khatah £110,000 vel hlawh tura ngaih a ni.

July 2014-a Sou­thamp­ton aṭanga pound maktaduai 25-a Liverpool zawmtu midfielder chuan, "Club leh ma­nager ten ka chungah rinna an nghat tlat a ni tih hriat hi a nuam takzet a, he hmun hi ka awmna tur dik tak a ni. Hmabak eng tak thlir ṭhin player tan chuan helai hmun aia duhthlan tur hi a awm chuang lo," tiin Liverpool chu nuam a tih thu a sawi.

Kum 28-a upa Lallana hian Reds tan tun season-ah inelna hrang hrangah match 30 khelin goal 10 a khung tling tawh a, Reds a pan hnuah Premier League match 80 inlanin goal 16 a khung sak tawh bawk.

Lallana hma hian Liverpool hian an pla­yers pawimawh zingah Philippe Coutinho chu kum nga chhung atan contract thar an lo ziahpui tawh a, Brazilian midfielder hi Reds players zinga hlawh hnem ber niin kar khatah £150,000 a hlawh mek.