Chennai City squad-ah mizo 3 tel Tank leh Amiri te an tel lo
I League-a Aizawl FC khingpui tur Chennai City chuan Nilaini khan Aizawl an rawn thleng a, player 21 rawn zin zingah Mizo pathum an tel a, hetihlai hian an star pahnih Marcos Tank leh Afghan midfielder Haroon Fakhruddin Amiri-te an tel lo.
Coach thar hnuaiah
Chennai City hian Robin Charles Raja hnuaiah match sarih khelin vawi khat chiah an chak a, vawi nga lai an chak lo. Result chhiat avang leh Tamil player a duhsak tawk loah ngaiin thuneitu lamin Charles hi an ban a, an thlakna chu Railways coach hlui V Soundara Rajan a ni.
Soundara Rajan hnuaiah Chennai City hian Mumbai FC an hneh nghal a, Churchill Brothers lakah point khat an hlawh chhuak leh bawk. Amaherawhchu an match hnuhnung berah Shillong Lajong 1-4 in an ngam loa, he inkhelah hian North East club tan Isaac Vanmalsawma'n freekick aṭangin a khung.
Tank tel loin
Lajong an hneh loh ṭum hian Times of India lam chuan khelmualah Brazilian forward Marcos Tank leh Kerala midfielder Denson Devadas te an intihthiam loh thu an ziak a, foreigner pahnihin hlawh an lak mumal loh avangin Aizawl FC hmachhawn ve lohah club an vau thu an ziak tel bawk.
Amaherawhchu TOI vek hian hlawh chungchang hi an tihfel hman thu an ziak leh tawh a, chu ti chung chuan Aizawl FC an hneh ṭuma goal pawimawh khungtu Tank chu player 21 zin zingah a tel lo.
Brazilian forward Tank hian coach thar Soundara Rajan hnuaiah hmun pawimawh a chang pha lo hrim hrim a, Mumbai FC an hneh ṭuma a inlan loh bakah Churchill Brother leh Lajong an hmachhawn ṭumin bench aṭang ve vein a lut bawk.
Haroon Amiri erawh yellow card pali hmuh vangin a rawn zin tel lo a, Afghan player hi an intawn hmasak ṭumin goal venhim kawngah a pawimawh hle. Match hnuhnung bera Lajong an hneh loh ṭumin Amiri-a'n goal khat a khung a, amaherawhchu he inkhel hi Soundara Rajan hnuaia a inkhelh awm chhun a ni.
Mizo pathum
South Indian club hian Aizawl FC hmachhawn turin Malsawmfela leh a nau Lalnunmawia bakah midfielder Liandala (Sena) te an hruai a, Mizo pathum hian khelhna hmun an chan dawn leh dawn loh hriat theih a la ni lo.
MPL5-a Bethlehem Vengthlang forward Mawitea'n match hmasa bera Minerva Punjab nen an inhnehtawk ṭuma bul a ṭan hnuah a club hlui Shillong Lajong an tlawh ṭumin bench aṭangin a lut a, vawi hnih chiah a la inlan.
MPL5 best player Sawmfela'n vawi khat chiah inkhel bul a la ṭan a, bench aṭangin vawi hnih a lut tawh bawk. BVT tan pawha khel tawh midfielder Sena pawh vawi khat chiah a la inlan bawk.
Soundara Rajan-a'n Chennai City a enkawl hnuah Mizo player pathum hi squad-ah dah an la ni lo a, Aizawl FC an khelh ṭumah erawh Railways coach hlui hian Mizoram chhunga an tawnhriat hman ṭangkai ngei a tum ang.
Aizawl FC Vs Chennai City
February 25, Inrinni - 2:05 PM
RG Stadium, Mualpui
Upper Gallery - Rs 200; Lower Gallery - Rs 100
TICKET LEI THEIHNA
1. Aizawl FC Merchandising Centre
2. Raw Digital, Near Vanglaini Office, Zarkawt
3. Stalwart, Opposite Mission Veng Bus Stand
4. Din Din Pharmacy, Khatla Kawn
5. Emmanuel Store, Near Greenwood Hospital, Bawngkawn
6. Carz Spa, Millenium Centre, Motor Silna
7. David Security Solution, Near Zote Bakery, Chanmari
8. HB Enterprise, Hero Cycle, Lower Zarkawt
9. RS Traders - Third Eye Solution, Bawngkawn, Durtlang Road