Entu tam mah se A la SEN tawk lo

I League-ah Aizawl FC-in result an nei ṭha a, RG Stadium, Mualpuiah mipui an kalkhawm an ṭha hle. Mizo club-in East Bengal an mikhual ṭumah phei chuan stadium-a leng lo mipui an pungkhawm a, ticket chang lo pawh mi ṭhahnem tak an awm bawk.

Season liam taa inkhel hmuhnawm tih vanga stadium pan an tam a, tun season-ah erawh inkhel thlir tur ringawt niloin Aizawl FC ṭan tura pungkhawm an tam tawh. Mizo club ṭantuten thawm an neih ṭhat avangin mikhual lam pawhin RG Stadium-a khelh an huphurh phah a, Aizawl FC pawhin result an nei ṭha - match rukah vawi nga chakin an draw chhun pawh champion lai Bengaluru FC an ni.

Kolkata club lian East Bengal meuh pawh Aizawl FC lakah an tlawm a, Mizo mipuiin an thawhhlawk hle. Inkhel chhim tura Aizawla rawn zin pawhin mipuiin 'Mexican Wave' an siam an hmuh chiah chuan ropui an ti a, AFC ṭantute thawm chu mikhual player-te tan chuan zamna tham a ni. RG Stadium-ah Mizo mipuiin 'Ro min rel sak ang che' tih an sa rual thei a, hla dang ṭha tak tak an sa chho zel ang.

Amaherawhchu Aizawl FC ṭantu Mizo mipui zingah kawr sen ha an la tam tawk lo. RG Stadium khat tlata a sen hunah chuan mikhual tan pawh Mizo club hmachhawn a harsa lehzual dawn a, a mawi zawk ang a, a ropui zawk bawk ang.

Aizawl FC-in Inrinni hian Chennai City an hmachhawn leh dawn a, hnehna an chang a nih chuan champion beiseina an chhi nung zel dawn tihna a ni a, mipuiin kawr sen nena an puih a ṭul dawn a ni.