A hautak dawn - Lewis Hamilton

Lewis Hamilton chuan March thla a ṭan tur Formula 1 season thar a thlir a, kum dang zawng aiin inelna a hautak zawka a rin thu a sawi chhuak.

Mercedes driver Hamilton hi season hmasa khan championship-ah pahnihna a ni a, a tluk loh chu a teammate Nico Rosberg a ni. German tlangval Rosberg hi a champion aṭanga ni nga hnuah a chawlh avangin season tharah a hmel kan hmu dawn lo.

Kum 32-a upa Hamilton chuan, "Engtiang chiahin nge kan inan theih dawn ka la hre bik lo a, mah se thil lang chiang tak pakhat awm erawh chu kum dang aiin a harsa dawn, ka thawhrim a ngai hle ang," a ti. Mercedes hian season tharah chuan car thar an hmang dawn a, nikuma an hman aiin lap khat chu second li zeta thleng hma thei tura ngaih a ni.

World champion vawi thum ni tawh Hamilton chuan sawi chhunzawmin, "Engineer ten min hrilh dan chuan car thar hmang hi chuan midang tlan pelh a harsa tawh zawk dawn a, chuvangin qualifying a pawimawh zual dawn," a ti.

Kumin Formula 1 season hi March 26 khian tlan ṭan a ni leh tawh dawn a, a hmasa ber atan Australian Grand Prix an tlan ang. Intlansiak hi 20 awm tura ruahman niin November 26-ah a hnuhnung ber atan Abu Dhabi Grand Prix tlan tur a ni.