United lawm a kim lo

Manchester United-in Nilaini zan khan Saint Etienne chu Henrikh Mkhitaryan-a goal hmangin 1-0 in an hneh. Old Trafford-ah Zlatan Ibrahimovic hattrick hmanga 3-0 a an chak tawh bawk avangin Jose Mourinho hote hian aggregate-ah 4-0 in hnehna an chang.

Red Devils hian Geoffroy Guichard-ah hnehna chang mah se goal khungtu Mkhitaryan leh Michael Carrick te chu inhliam vanga lakchhuah an ni a, defender pawimawh Eric Bailly chu yellow card vawi hnih hmuh vangin hnawhchhuah a ni bawk.

United rual hian Krasnodar leh Schalke 04 ten Europa League last 16 an lut a. Nizan khan last 32 match tam zawk khelh niin last 16 fixtures hi Zirtawpni zan 5:30 khian Nyon-ah pawh a ni ang.

Harsatna awm loin

Manchester United tan goal thum humhim hi hna harsa a ni lo a, Jose Mourinho-a'n a second team pawh luhtir se Saint Etienne player aiin an man a la to zawk dawn bakah team ṭha zawk an la ni tho ang.

Portuguese manager Mou­rinho erawhin Swede forward Ibrahimovic leh khawvel player manto ber Paul Pogba te inkhel bul a ṭantir a, an intawn hmasak aṭangin player pathum chiah a thlak danglam a, FA Cup-a Blackburn Rovers hnehtute aṭang erawhin player paruk a thlak danglam thung.

Minute 16-na lekah Juan Mata cross chu Mkhitaryan-a'n khawih peng zeuhin goal hmahruai a khung nghal a, English club-in away goal an neih avangin Saint Etienne tan last 16 thleng turin goal nga khung a ngaih phah. United-in harsatna an tawk lo a, inkhel hmuhnawm hmuh zui tur a awm lo.

United an khawng

Jose Mourinho hote hian Europa League group match hnuhnung bera Zorya Luhansk (December) an hneh aṭangin match 18 an khel leh tawh a, goal sarih chhuahin match 14-ah hnehna an chang.

United hian December 2013 hnua a vawi khat nan European competition-ah match zawnin vawi li clean sheet an neih lehna hmasa ber a ni. Goal khungtu Mkhitaryan-a'n inelna hrang hrang match hnuhnung paruk a inlanaah goal thum khung­in assist vawi hnih a nei bawk.

Goal khung lamah pawh Zlatan-a khelhna club hian match hnuhnung 26-ah vawi khat chiah goal khung lohna an nei. Chu chu February 1-a Hull City nen goal awm loa an inhnehtawk kha a ni.

Mourinho thukhawchang

Manchester United coach Jose Mourinho chuan, "Goal khatna khan an beiseina a titawp a, stage sang zawk lut thei dinhmuna kan din hnuah pawh chak duhna kan la nei reng bawk. Kan khelh dan kha fak hluai tur awm lo mah se inkhel kan thunun a, chak kan phu a ni," tiin French club laka chak an phu thu a sawi.

Portuguese coach Mourinho chuan, "Hamouma hian theihna sang tak a nei a, tluk der nuam a ti mah mah bawk. Eric-a'n last 16 match hmasa zawk a khel thei dawn lo a, chutihrualin player dangin khelhna hun ṭha an neih phah ang," tiin French winger Ro­main Hamouma tluk der vanga Ivorian defender Bailly chu hnawhchhuah a nih thu a sawi.

Player inhliam chungchang sawiin Mourinho chuan, "Tlang taka sawi chuan Henrikh leh Michael te hian EFL Cup final an khel thei lo ang, amaherawhchu ka thutlukna hi ka tawnhriat aṭanga sawi ka ni. Medical lamin an enfiah hunah thuchiang zawk a awm ang, hetiang inhliam hi chu match khelh tam vang a ni. Player khel tlem zawk tan hun ṭha a awm tihna a ni," tiin inhliam nei mah se a êng zawngin a thlir. Saint Etienne an khelh ṭum hian veteran midfielder Carrick thlak nan German midfielder Bastian Schweinsteiger chu hman a ni.

Inkhel dang

Fenerbahce-in khualmualah Krasnodar chu 1-0 in an hneh lo a, Istanbul-ah pawh minute 7-na lekah Russian club-in Fyodor Smolov hmangin goal an khung nghal. Turkish club beiseina siam turin Josef de Souza-a'n goal khat chhang let mah se goal dang an khung belh thei lo a, Krasnodar hi aggregate-ah 2-1 in an chak.

Kar liam ta khan Schalke-in PAOK 3-0 in an sawp a, German club hian an mualah German club Alessandro Schopf hmangin hma an hruai a, Greek club tan beisei tur a awm tawh lo. Schalke defender Matija Nastasic-a'n an lamah tilut mah se German club hian harsatna an nei lo, aggregate-ah 4-1 in an chak.