Wayne Rooney China-ah United captain a pem dawn em ni?

Manchester United ma­nager Jose Mourinho-a'n Wayne Rooney hmalam hun a hriat loh thu a sawi hnu lawkah Red Devils ṭantute tana thu hriat nuam lo tur a awm a, Rooney agent Paul Stretford chu China-ah a player tana khelhna tur club zawngin a zin!

Chinese Super League transfer chu February 28-ah khar a ni dawn a, hemi hma hian Rooney transfer chungchang tihfel a nih hman dawn leh dawn loh la chiang lo mah se Everton striker hlui hian nipui bazar-ah tal chuan United hi a chhuahsan ngei dawn niin a lang.

Eng club-ah nge?

Rooney hi hun rei tak chhung Chinese Super League nen sawizawm ni tawh mah se a agent Paul Stretford hian eng club ber nge a biak tih a chiang lo. Tun hnaiah United tana goal khung hnem ber hi Beijing Guoan nen sawizawm ni mah se China president Xi-a club ṭan ber Beijing thuneitute zinga mi chuan BBC hnenah Rooney lakluh an tum loh thu a hrilh.

Beijing Guoan berin Rooney lakluh an tum loh thu an sawi takah chuan foreign players neih theih zat panga chu pathumah tun season aṭanga tih hniam a nih bawk si avangin Rooney lalut thei club chu tun dinhmunah chuan Jiangsu Suning leh Tianjin Quanjian te chiah an ni.

Chinese FA chuan CSL club ten foreign player a sum an sen uchuak lutuk ven nan dan thar an siam. He dan thar hnuaiah hian club tinin foreigner panga bak neih a thiang lo a, chung zinga pakhat chu Asian player a nih ngei a ṭul a, squad-ah phei chuan foreigner pathum bak awm a thiang lo.

Mahse, Rooney lalut thei dinhmuna ding Tianjin Quanjian coach Fabio Cannavaro chuan United captain hi inbiakna an neihpui ngei thu leh an beisei anga thil a kaltluan loh thu a sawi tawh.

Rooney pem ta se...

England international Rooney hian China pan ta se Three Lions (England sawina) tana a inlan chhunzawm loh a rinawm zawk. England tan vawi 119 inlana goal 53 khungtu striker hi ram tana khel tura koh a nih chhunzawm loh chuan England tana inlan hnem ber ni tura match sarih chiah mamawh tawh striker hian Peter Shilton (125) record khum a beiseina chu Old Trafford ruala a mangṭha tel a ṭul ang.

Manchester United striker hian a duhthlan hmasa ber chu Old Trafford-a a contract neihlai anga kum 2019 thleng khelh a ni a, mah se khelmual chhungah hmun a chan tam miau loh avangin English striker hian sum tamna lam a hawi lo thei lo. Premier League nomawi panga leh Champions League vawi khat champion tawh striker hian kar khatah £300,000 a hlawh mek a, CSL a pan a nih chuan a hlawh hi a let khat vel tala pung tura ngaih a ni bawk.

Thlirna

Premier League club ten an players duhzawng lalut turin khawvel hmun hrang hrangah scout tir kualin players an thlithlai ṭhin a, CSL club-te erawh player agent ten direct takin an dawr mai ṭhin. Chinese club tan an players zawnna position-a an players neihte chu agent te hian an va zawrh a, inremna an siam ṭhin.

CSL-a kal foreign players langsar reng rengin kum thum aṭanga kum nga daih tal contract an phut ṭhin a, hei hi a chhan chu sum leh pai lamah hlauthawng loa awm an duh vang a ni ber. Rooney pawh hi kum 31-a upa a ni tawh a, United-a hlawh hniam zawka contract rei lo te neih ai chuan CSL lama kum tam zawk hlawh tam tak lakluh a duh niin a lang.

December 17 hnua match thum chiah inkhel bul la ṭan Rooney hian United leh Everton tan a nih loh chuan English club dangah khelh a tum loh thu a sawi chiang tawh bawk.