Juve ram chhuak an hlawhtling
Substitute pahnih Marko Pjaca leh Daniel Alves te goal hmangin Juventus chuan khualmualah FC Porto 2-0 in an hneh. March 14-ah second leg khelh a ni dawn a, Italian champion hi Champions League quarter final lut turin an dinhmun a ṭha tawh.
Nilaini zan Champions League last 16 first leg inkhelah Juve tan Gonzalo Higuain leh Mario Mandzukic ten bul an ṭan a, goal khung an tum tih a chiang. Porto defender Alex Telles chu yellow card vawi hnih hmuh vangin minute 27-naah hnawhchhuah a ni. Tun season Champions League khelh meka red card hmu rang ber a ni.
Super sub...
Massimiliano Allegri naute hian ball possession 77% zet changin inkhel thunun mah se goal an khung thei lawk lo a, Paulo Dybala-a'n goal ban a tihper bak first half-ah sawi zui tur an ngah bik lo.
Italian manager Allegri-a'n second half-ah thluak a hmang, minute 67-naah midfielder Juan Cuadrado la chhuakin Pjaca a dah lut, Croatia international Pjaca hian Porto defender tihsual nangchingin khelmual a luh aṭanga minute nga hnu lekah goal hmahruai a khung. Goal hmasa ber a luh theih nan Dybala-a'n a thawh hlawk hle.
Defender Stephan Lichtsteiner thlaktu Alves pawhin an goal hnihna khung turin khelmualah second 80 bak hun a mamawh lo. Barcelona defender hlui hian Alex Sandro hnen aṭanga a ball hmuh chu yard ruk leka hla aṭangin a hlap lut. Real Madrid keeper hlui Iker Casillas tan tih theih a awm lo.
Juve hmabak a eng
Kum 1995 March thla khan Sampdoria chuan khualmualah Porto hi an lo va hneh tawh a, he mi hnuah Juve hi Italian club zinga Porto luhchhuah leh thei hmasa ber an ni. Juve hian first leg-ah 2-0 a hnehna an chan tawh hnuhnung vawi ngaah round sang zawk an lut zui ziah.
Second leg khelhna tur hi Juve khelmual Juventus Stadium a ni. Old Lady (Juve sawina) hian an khelmual hi an hmangthiam em em a, nikum December thla khan Inter Milan chu penalty shootout-ah an hneh lo a, inkhelh pangngaiah an khelmuala an chak loh hnuhnun ber chu kum 2015 August daih tawh kha a ni.
Serie A champion leh hmahruaitu ni bawk Juventus hian tun hnai kum nga chhung chu league-ah rorel thei mah se Europe-ah an hlawhtling thei lo a, tun season-ah hian kum 1996 hnua Champions League nomawi chawi an tumna kawngah kawng dik an zawh mek.
Eng nge an sawi?
Juventus manager Allegri chuan, "Ka naute hian hmasawnna tur an la nei a, chutihrualin Porto lakah khan kan puitling tawh tih chu kan lantir chiang hle. Season kal meka hun pawimawh bera ngaih kan thleng mek a, dawhthei leh huaisen taka kan awm a ngai. 2-0 hi result ṭha tak a ni a, chutihrualin kan dinhmun hi a la him bik lo," tiin a sawi.
Porto coach Nuno Espirito Santo chuan, "Champions League-ah chuan referee thutlukna hian result a nghawng thei em em a, vawiinah pawh khan player inzata khel tluan chu ni ila a danglam ang," tiin a sawi.