Valencia lakah Real Madrid an tlawm
Real Madrid chuan La Liga-ah hmahruai fal theihna hun ṭha an neih an bawhpelh. Nilaini zan khan Zinedine Zidane-a naute hi Valencia lakah 2-1 in an tlawm a, tun season league match 22 an khelh tawhah an vawi hnih chak lohna chiah a ni.
Mestalla Stadium-a inkhelah West Ham striker hlui Simone Zaza leh Fabian Orellana ten Valencia tan goal an khung a, Cristiano Ronaldo chuan chawlhlawk hmain an siphurh pakhat zawk sutin goal dang erawh a lut zui lo. Real Madrid hian point 52 hmuin league hmahruaitu an la ni tho a, an hnuaiah point 51 hmutu Barcelona an awm - Catalan club hian match khatin an khel tam zawk.
Zaza goal
Valencia-in tun season-ah beisei an phak loh em avangin manager pathum ngawt an nei tawh! Manager Voro-a'n January thlaa an lakluh Zaza chu inkhel bul a ṭan tir a, Italy international hian minute lina lekah Munir El Haddadi hnen aṭanga a ball hmuh chu rang taka vir puiin Real Madrid goal kilah a hlap lut.
Juventus tan pawha goal nga khung tawh Zaza hian nikum May thla hnua a goal khung lehna hmasa ber a ni. Hammers-ah loan-a a khelh chhungin match 11 a khelh aṭangin goal khung lo mah se Zaza hian a thiam a la theihnghilh lo tih lantirin Real defender Raphael Varane a ti mualpho chiang hle.
Kum 23-a upa Varane a talbuai chunzawm, goal an chhuah aṭanga minute nga hnu lekah France international defender-in holam taka a ball hloh kal zel chu Orellana-a'n a khung zui! An goal hnihna siamsaktu hi Manchester United winger hlui Nani a ni - Portugal international hian through ball ṭha bik a pe.
Real Madrid tan Ronaldo leh Karim Benzema ten Valencia tlarhnung an rumṭhaih zui a, chawlhlak hma chiahin Portugal captan Ronaldo hian Marcelo cross a tauh lut. Kum 32-a upa Ronaldo hi club pathum Sporting CP, Manchester United leh Real Madrid tan inelna hrang hranga a khelh zat chu match 700 a ni ta a, goal 509 a khung tawh!
Zidane-a'n point hmuh ngei tumn Gareth Bale chu bench aṭangin a luhtir a, hliam vanga thla thum zet a chawlh hnua a match hnihnaah Bale hian goal khung theihna hun ṭha a neih chu Enzo Perez-a'n a lo dan sak, Wales captain hian Espanyol a hmachhawn ṭum angin vanneihna leh goal a luhpui lo.
Zidane thukhawchang
Real Madrid manager Zidane chuan, "A nihna takah chuan a tir minute 10 chhung khan kan chak lo fel der tawh. Minute 80 dang thawhlehna hun kan nei a, goal khat bak kan khung thei lo, a tawpah kan tuar ta a ni," tiin a sawi.
Real Madrid hian nikum (2016) khan inelna hrang hrangah Zidane kaihhruaina hnuaiah match hnih chiah chak loh an nei a, kuminah erawh beisei angin an kaltluang lo - Thla hnih pawh a ral hmain vawi thum an chak lohna a ni der tawh.
Zidane chuan sawi chhunzawmin, "Tunah hian point khat chiahin hma kan hruai tawh a, match khatin khel tlem zawk mah ila point hmuh belh tur chuan rim taka kan thawh leh phawt a ngai dawn. Inkhelah chak zawk tur sawi lawk theih a ni lo a, chuvangin tunah chuan a chung bera kan awmna hi ngaihṭhatna chhan tur a awm rih lo," a ti.
Real hian January 16 khan league match-ah Sevilla 2-1 in an ngam lo a, hemi hnuah a zawnin match li chhung hnehna an chang, a vawi nga chak an tum niah erawh an tlawm. Hetihlai hian Valencia erawh a zawna vawi hnih an tlawm hnuah chak ni hmel an hmu ve leh ta a, point 26 hmuin league table-ah 14-na an ni.