Premier League record siam duhtu Arnold

Liverpool right back ṭhangduang Trent Alexander-Arnold chuan Premier League nomawi chawi tawh mah se chawlh hahdam mai an la tum loh thu a sawi a, record siam chung ngeia season khar an tum. 

Reds hian an league match hnuhnung berah Brighton & Hove Albion chu 3-1 in an hneh a, league match 34 an khelh tawha vawi 30 an chakna a ni - heti zat chak nei tura Premier League-a match mamawh tlem ber record an siam. 

Liverpool hian Premier League season khata point hmu hnem ber record an la siam thei a, league match 34 an khelh tawh aṭangin point 92 an nei. Match li khelh tur la awm ṭangin point 12 hlawhchhuah tur an la nei a, record ding lai hi Manchester City chelh niin 2017-18 season khan point 100 an hlawh chhuak. 

Arnold chuan, "Theihtawp chhuah zel kan duh a, kan inkhel apiangah hnehna chan zel kan duh. Premier League-ah kan champion tih a chian hnua kan duh ber chu season khata point hmu hnem ber record siam a ni a, Premier League chanchina team ṭha tak kan ni tih hi mi ten hria se kan duh a ni," a ti. Liverpool hian zanin dar 7:30-ah Burnley an mikhual dawn a, captain Jordan Henderson erawh a inlan theih a beiseiawm loh. Hendo hi Brighton lakah a inhliam a, khawthlang media ṭhenkhat chuan season thar bul pawh ṭan thei lo tur ang hialin an tarlang - he thu buatsaih thleng hian thuchiang tak erawh kan hre hman lo.