Zanin dar 12:30-ah Europa Conference League Final Roma vs Feyenoord: Mourinho tan fiahna hautak

European football-a club inelna thar, Europa Conference League final chu zanin dar 12:30 hian khelh a ni dawn a, AS Roma leh Feyenoord ten champion an inchuh dawn.

Khawvel coach ropui hming lam a nih apianga lam hmaih ni ngai lo Jose Mourinho chu Roma boss a ni a, tun hnaia a record ropui lo tak avangin Portuguese coach hi football khawvelin an hnungchhawn ṭan mek.

Mahse, Chelsea legend hian a hming chher leh turin kawng dik a zawh ṭan mek - zaninah ECL final-ah Roma a kaihruai dawn a, a champion pui a nih ngat chuan European club liante chil a put lehnghal ang.

Mahse, Feyenoord hi ECL-a tlawm nei miah loa final lut an ni a, Mourinho leh a naute tan awlsam taka hneh theih an ni dawn lo - Feyenoord tan UEFA Cup, 2002 an champion hnua European final an khelh leh hmasak ber tur a ni a, Roma tan UEFA Cup, 1991 final hnua European final an khelh leh hmasak ber tur a ni a, kum 1961 khan Inter-Cities Fairs Cup-ah an champion ve tih loh chu Europe-ah chhuan tur an nei lo bawk.

Mourinho beiseina
Roma-in tun season-a an league match hnuhnung berah Torino chu 3-0 in an hneh a, ECL final atana inpuahchahna ṭha tak a ni - inkhelh zawhah Mourinho chuan press ho a hmachhawn duh lo zui!

Mourinho-a'n media a hmachhawn duh loh chhan hi Feyenoord lama insawrbing nghal a duh vang niin an sawi a, club thuneitute nena inbe rem sa thlapin, media lam hmachhawn lo tur hian thutlukna an siam.

Manchester United boss hlui hian inkhel pawimawh hmabak laiin media intihbuai tir a duh lo tihna a ni a, eng ang takin nge inbuatsaihna an kalpui chhunzawm ang, tih chu thil hriat châkawm a ni.

Torino an hneh zawhah hian Tammy Abraham leh defender Gianluca Mancini te chuan media an hmachhawn a, Mancini chuan, "Feyenoord kan la zir hman lo a, Torino chiah kha kan ngaihtuah a ni," tiin a sawi a, Mourinho-a'n inkhelh zawh veleha Feyenoord lam a hawi nghal hi a awm lo hran lo.

Roma an dam
He thu buatsaih lai hian Roma player zingah inhliam tharlam sawi tur an awm lo a, Armenia international Henrikh Mkhitaryan erawh a hmaa a hliam vangin a inlan theih a beiseiawm chiah lo.

Mahse, Italian club tan manganna tur a awm lo - tlarhmaah tun season-a goal 27 khung tawhtu Tammy Abraham a awm a, mual sir aṭanga pui turin goal 14 leh assist vawi riat nei tawh Lorenzo Pellegrini, goal sarih leh assist vawi kua nei tawh Nicolò Zaniolo te an awm bawk.

Roma-in goal khung an harsat a nih chuan bench aṭanga lut turin tawnhriat nei ṭha Stephan El Shaarawy leh Uzbekistan forward Eldor Shomurodov te an awm bawk a, Feyenoord tan hmachhawn châkawm an ni lo.

Mahse, Roma hian ECL final kalkawngah ngam loh club pakhat an nei a, an hming chu Bodo/Glimt a ni - vawi li an intawnah vawi hnih an ngam lo a, quarterfinal aṭangin pet chhuak ta tho mah se Feyenoord lamin Bodo/Glimt leh Roma inkhel hi inzir nan an hmang ang a, chak an tum ngam ang.

An ṭha...keini pawh!
Dutch club Feyenoord-in Eredivisie lamah pathumna dinhmun an hauh hram a, champion tum ṭhin club an nih avangin an tan result ṭha a ni lo - ECL chu an season ṭha lo thup mawina remchang a ni a, champion ngei an duh dawn.

Feyenoord boss Arne Slot chuan, "Team ṭha chauhin final an lut ṭhin a, chuvang chuan team ṭha tak kan hmachhawn dawn tih hi thil chiangsa a ni. Chutihrual chuan AS Roma pawhin team ṭha tak hmachhawn tur an nei," a ti a, a player-te a ring tawk.

Kum 22 mi Luis Sinisterra hi Roma tan ven bik tur a tling dawn. Colombian forward hian tun season-ah goal 23 khungin assist vawi 14 a nei tawh a, Roma tlarhnunga Chris Smalling leh Mancini te ho tan ven a châkawm lo ang.

Hetihlai hian ECL khelh meka top scorer (10 goals) Cyriel Dessers pawh theihnghilh loh a ṭha - ani hian inelna hrang hrangah goal 21 khungin assist vawi ruk a nei tawh a, ven bik ngai zinga mi a ni.