Mizoram pum huap football inelna awm dawn

Mizoram Football Association chuan Thawhṭanni khan thuchhuah an siam a, All Mizoram Inter Village Football Tournament an buatsaih dawn.

Covid-19 hri len hnuah Mizoram huap inkhel lian tham buatsaih a ni tawh lo a, football ngainatuten an ngaihven nghal hle.

MFA chuan, "Kum hnih aia rei hripui avangin football khelh theih a ni lo a, player tam tak chawl tawhin player thar ṭha tak takte tan pawh bul ṭanna leh inpho lanna remchang (exposure) a awm lo rei tawh a, hei vang hian MFA Executive Committee thukhawm chuan Mizoram pum huap football inelna siam a rel," tiin inelna an buatsaih chhan an sawifiah.

MFA buatsaih tur inelna hi tualchhunga football inelna sang ber Mizoram Premier League nen hriat pawlh loh a ṭha a, MPL hi chu club inelna niin registration pawh fel taka tih vek a ni. Inter Village Football Tournament hi chu veng leh veng emaw khua leh khua emaw inelna tihin a sawi theih.

Tun hmain MFA-in hlawhtling takin Red Ribbon Football a buatsaih tawh ṭhin a, CYMA nena ṭangkawpin CYMA Football a buatsaih ṭhin bawk.

MFA chuan, "All Mizo-ram Inter Village Football Tournament hmang hian footballer-te tana remchanna siamsak a, football club tán pawha player zawnna (scouting) hun ṭha siam chu MFA chuan ṭha a ni a, he inelnaa tel tur hian khúa leh veng zawng zawng a sawm nghal bawk a ni," tiin inelna chu player-te tana inphochhuahna remchang a nih tur thu a sawi.

Inelna hi June, 2022 thlà chawhnu lama ṭan hman turin ruahmanna siam a ni. Chawpchilh taka inelna buatsaih a nih chhan hi AIFF player registration vang a ni a; club-ten an player duhzawng an hmu a nih chuan AIFF hnuaia an ziahluh a ngai a, hemi a nih avang hian inelna zawh hma hi a ṭul a, club tana player zawnna remchang MFA hian buatsaih an tum.

Kum 2019-a MPL final hnuah hripui vangin Aizawlah senior level inelna MFA hian a buatsaih thei lo a, club football inelna atana rahbi pawimawh turin inter village football-a bul ṭan a tum - MFA season thar hi June-ah a inṭan dawn a ni.