Paris khawpuiah Nadal a inlar

"Hma zawngin na takin ka vaw phei a, tennis ka khelh tawh china ka vuak nat ber a ni hial mai thei - mahse rang zetin ball chu a rawn let. Backhand lamin ka vaw let a, mawi leh nalh tak pawhin ka volley, mahse a rawn let zel," tiin Jordan Thompson chuan Rafael Nadal hmachhawn hautak a tih thu a sawi.

Nadal-a'n Thawhṭanni zan khan French Open 2022 atana a match hmasa ber a khel a, a khingpui Thompson lakah buaina a tawk lo. Roland Garros vawi 13 champion tawh hian 6-2, 6-2, 6-2 in hnehna a chang.

Inkhel dangah Novak Djokovic pawh a chak. World number 1 leh champion lai ni bawk Novak hian Yoshihito Nishioka chu 6-3, 6-1, 6-0 in a sawp a, a nomawi kawl lai humhim turin bul a ṭan fuh hle. Federico Coria leh Alex Molcan inkhela chak zawk a hmachhawn leh dawn.

Nadal a tlo
Rafael Nadal-a'n French Open a khelh hmasak ber aṭangin kum 17 a liam tawh, khami ṭuma a hmachhawn chu Lars Burgsmuller a ni. German tlangval hian tunah chuan nupui neiin fa pathum a nei tawh, tennis chawlhsanin radiologist a ni tawh!

Nadal erawh a la inkhel reng, tun hnaiah a ke hliam vangin khel ṭha tawk lo mah se French Open a nih chuan a theihna thup theih a ni lo. Paris khawpui bikah hian match 106 zet hnehna a chang ta, ani ai chak tam an awm lo.

Grand Slam mala chak hnem lamah - Wimbledon match 105 chak tawh Roger Federer a khum a, a chungah hian All England Club-a vawi 120 chak tawh Martina Navratilova chiah a awm, hei erawh a la hlat deuh.

Kum 35 mi Nadal chuan, "Bul ṭanna ṭha tak a ni, tun hma lam result chu sawi theih ni lo mah se, tun dinhmun hi a pawimawh lai chu a ni. Major tournament-ah chuan a tir lama set hloh loh hi a pawimawh," tiin a sawi.

Seeded pangana Nadal hian a match lehpekah chuan Corentin Moutet a hmachhawn dawn. Tualchhung tlangval Moutet hian inkhel dangah 2015 champion Stan Wawrinka chu a lo hneh a, zuam sual theih tur a ni ang.

Novak a inkhel ta
Novak Djokovic hian ngaihdan danglam tak a nei ṭhin a, a rilru a sawhsawn mawh hle. Hripui laka invenna a lak duh loh avangin Australian Open pawh a khel lo ṭhak - Melbourne khawpui a thlen hnuah thawn haw a ni.

France ramah erawh vaccine la lo tan a inkhelh theih. Court Philippe-Chatrier-ah Djokovic a inlar a, a match hmasa berah world number 99 Yoshihito Nishioka chu 6-3, 6-1, 6-0 in a hneh, kum 35 tlin cham lawmna ṭha tak a ni ngei ang.

Japan tlangval lakah Djokovic-a'n inkhel a thunun a, kawng engkimah a chungnung zawk. Hnehna chang tur hian darkar khat leh minute 58 bak a mamawh lo, a service vawi khat hloh ve mah se a khingpui hi vawi riat ngawt a chhuhsak thei, harsatna a tawk lo tia sawi theih a ni.

Seeded pakhatna Djokovic chuan, "Nishioka kha player che rang tak a ni a, hmachhawn pawh a awlsam lo. A khelh dan phung hre tur khan a tirah ka ngaichang a, ka man hnuah erawh hmachhawn dan ka thiam," tiin a sawi.

Season kal laiah Djokovic-a'n match a la khel tam tawk lo, tun hma lama a inkhel ang kha chu a la phak lo. Nishioka lakah pawh a tihsual vanga point a hloh hi 32 a ni a, round sang zawkah chuan tihsual avanga khingpuite point pek hnem hi a pawi thei ang.

A ṭawng zui
French Open zawhah Wimbledon an khel dawn. All England Lawn Tennis Club (AELTC) chuan Russian leh Belarus player-te inlan ve an phal dawn lo. ATP leh WTA chuan world ranking an pek bik loh tur thu an sawi ve nghal bawk.

Zawhna chhangin Djokovic chuan, "Australian Open ka khel thei lo a, Wimbledon-ah ranking a awm dawn lo bawk. World ranking point 4000 chu ka hum thei lo tihna a ni, mimal tak chuan a na hle. Kil hrang hrang thlir pawhin Wimbledon thutlukna hi a dik lo.

"Kei chuan Wimbledon thutlukna kha ka pawmpui ve lo, a nihna tak sawi chuan ram pahnih buaina kha infiamna khawvelah an lo huk lut ve mai a ni," a ti. Novak hi chuan zep nei loin a ngaihdan a sawi chhuak mai ṭhin.

Inkhel dangah US Open 2014 champion Marin Cilic chuan Attila Balazs 6-0 6-1 6-2 in a hneh a, inkhel inhnehtawk takah Taylor Fritz chuan Santiago Rodriguez Taverna nen set nga an khelh hnuin 7-6 (7-2), 3-6, 6-3, 4-6, 6-4 in a hneh bawk.

Nikoloz Basilashvili-a'n set hnih a hloh hmasak hnuah Maxime Cressy 3-6, 2-6, 7-6 (10-8), 6-4, 6-4 in a hneh bawk a ni. Inelna neih ṭan niah Dominic Thiem erawh hneh nei loin a lo tla tawh - Austrian star hi tun hnaiah match 10 chuang chak nei loin a awm tawh.