Hmeichhe final khel tur a chiang

Zothan Autoworks Pro Volleyball League hmawr bawk a hnai zel a, hmeichhe inelna lamah final khel tur pahnih a hriat. Bungkawn leh Bethlehem Vengthlang ten May 26, Ningani zanah nomawi an inchuh ang.

Thawhṭan zan khan R. Dengṭhuama Indoor Stadium, Mualpuiah league round khelh niin, final lut turin Bethlehem VT chuan Durtlang lakah 25-18, 25-22, 27-25 in hnehna an chang a, a thiam pahnih zingah an inhlangkai.

League round hnu-hnung bera BVT an chak theih nan hian, point 23 neitu Elisian Medai a langsar hle - a phu ang ngeiin D3 Business Player of the Night atan thlan a ni, match dang ang bawkin an chak theihna hnar a ni.

Hmeichhe inelnaah hian team pali an inel. Bungkawn hian match thum an khelhah hnehna an chang vek, final-a an hmachawn tur BVT ngei pawh hi an hneh tawh. BVT hian Kanan leh Durtlang te an hneh ve bawk.

Nizan khan mipa inelna lamah semifinal khelh ṭan a ni a, vawi hnih champion tawh Hunthar leh Thutak Nunpuitu Team (TNT) an inhmachhawn - result erawh kan hre hman lo. Zanin hian a hmun ngaiah semifinal pakhat zawk khelh a ni dawn. Tuichangral leh Durtlang North an inhmachhawn ang.

Mipa - Semifinal
May 25, Nilaini
Tuichangral 08:00 PM Durtlang North

Hmeichhia - League Round
Bethlehem Vengthlang 3 - 0 Durtlang
(25-18, 25-22, 27-25)
D3 Business Player of the Night: Elisian Medai, Bethlehem Vengthlang
Final
May 26, Ningani
Bungkawn 08:00 PM Bethlehem Vengthlang