Khelmual bak ka ngaihtuah lo - Mbappe

Real Madrid nen ring taka sawi zawm a nih hnuah Kylian Mbappe-a'n a club khelhna Paris St-Germain-a cham a thlang a, French forward cham chhanah hian sawi rik a tam hle.

Khawthlang media-te chuan Mbappe hian contract thar a ziah avangin euro maktaduai 300 a dawng niin an sawi a, image right (amah aṭanga sum hmuh) tam zawk a chang ang a, chhiah paih hnuah kum khatah euro maktaduai 100 a la hlawh phak dawn nia sawi a ni bawk.

Hei chauh a ni lo - Mbappe hian coach chu a duh a thlang thei dawn nia sawi a ni a, sporting director-ah pawh a ngaihdan a thawh thei dawn a, player lut leh chhuak thlengin thu a nei dawn niin an sawi.

Mahse, Mbappe chuan, "Footballer, team zinga tel ka la ni reng a, chumi piahlamah chuan tel ka tum lo. Nikumah kha chuan chhuah ka duh tih mi zawng zawngin an hria - mahse, kum a liam a, thil a inthlak a ni mai," a ti a, media-a sawi zawng zawng chu a dik vek bik lo niin a lang.

A la tawp lo
Kum 23 mi Mbappe-a'n kum 2025 thleng PSG-a cham turin contract a ziak a, mahse, a hnawl tak Real Madrid tan a la khelh theih thu a sawi lang.

French striker chuan, "Kan hma hunah eng nge thleng dawn kan sawi thei lo a, hma hun ngaihtuah vak a ṭul ka ti lo. Tun hun chiah ka ngaihtuah rih a, tunah chuan PSG-a kum thum cham turin contract thar ka ziak a ni.

"Real Madrid chungchangah chuan, 'A tawp ta' tia sawi theih a ni lo," a ti a, Madrid fan-te lawmna tur a sawi. Mbappe hian Real zawm lo tura thutlukna a siam khan Real Madrid president Florentino Perez a biak thu a sawi zui.

AS Monaco aṭanga a professional career ṭantu forward chuan, "Real President leh club hi ka zah em em a, chuvang chuan pan lo tura thutlukna ka siam pawh khan Real President ka bia. Keimah ngeiin biak kha ṭha ka ti a, player ropui ni tur chuan rinawm a ngai a ni," a ti a, Real nen an inkarah thil ṭha lo a awm loh thu a sawi bawk.

100%
Mbappe chhuah dawn leh dawn loh chungchangah inhnialna a tam hman a, khawthlang media-te titi tui ber a ni - mahse, French striker chuan khelmualah a theihtawp a chhuah chhunzawm reng thu a sawi.

PSG tana Ligue 1 nomawi vawi li chawi tawh Mbappe chuan, "Ka game-ah 100% in rilru ka pe. Mi thusawia buai thei ka ni lo - mimal leh team angin hlawhtlin tumna ka nei a, game-ah 100% in rilru ka pek a ngai a ni," a ti.

Mbappe chuan sawi zawmin, "Khelmuala rilru pek a, season tawpa thutlukna siam thiam hi a pawimawh a ni," a ti zui - season hman zawh takah khan league match 35 khelin goal 28 a khung.

French striker hian inelna hrang hrangah match 46 khelin goal 39 a khung a, Ligue 1 Player of the Year-ah thlan niin, top scorer a ni a, season khata assist (19) ngah ber a ni bawk.

Ngaihlai France
Mbappe chuan PSG-a a cham chhan lian tak pakhat chu an ram club a nih vang niin a sawi. France international chuan, "Mahni ram chhuahsan a fuh loh vang pawh a ni a, ka ram a nih miau avangin lunglenna a awm ve a ni.

"Hei bakah hian club hmachhawpte thlak a ni a, ka hna ka la zawh loh avangin he hmuna cham hi ka duh thar leh ta a ni. Team leh mimal angin hnathawh tur tam tak ka la nei a, thawnthu thar ziah tur tam tak a la awm a ni," a ti.

Mbappe chuan mipui tana hlimna thlen a duh thu sawiin, "Game ropui leh pawimawh tak takah ka lo inlan tawh. World Cup meuh khelin ka champion a, hetiang taka nuam ti hian inkhelh zel ka duh a ni.

"Khelmuala inkhel en kha nuam ka ti ṭhin em em a, tunah chuan midangte tana hlimna thlentu nih ka duh ve tawh a, khelmual chhung leh pawna mite tihlimtu ni tura ka hun chu a inherchhuak ve ta a ni. Naupang tam takin min en tih ka hria a, mite tana entawn tur hnutchhiahtu nih ka duh. Football player ka nihna ang chauh pawh ni loin, midangte tana hlimna thlen ka châk a ni," tiin a sawi.

UCL beiseina
PSG hian season ṭan dawn khan khawvel nghawrnghing dawt khawpin Lionel Messi an lo lalut tawh a, khawvela footballer man to ber Neymar an kawl bawk - heti chung hian an duh ber Champions League-ah erawh an champion thei lo.

French club president Nasser Al-Khelaifi chuan, "Nomawi tam zawk chawi ka duh. Nomawi engemaw zat kan chawi tawh a, chawi belh zel kan duh. Champions League-a champion kan duh a, kawng dik pawh kan zawhin ka hria," a ti.

Hetihlai hian La Liga chuan PSG-in Mbappe an chelh dan chu na takin an dem a, UEFA mai bakah French leh EU thuneitute hnenah an hek tur thu an sawi. La Liga president Javier Tebas chuan football zahawmna tibawrhbang ang hialin a chhuah a, "European football dinhmun tiderthawngtu," a ti hial.

Mahse, Al-Khelaifi chuan, "La Liga aia Ligue 1-in kan ti ṭha zawk chu thil ṭha tak pawh a ni mai thei asin. La Liga hi kum thum emaw kum li liam ta ami ang kha an ni tawh lo. Club zawng zawng ka zah a, mahse, keini pawhin zah kan phu. Khawvela player ṭha ber kan kawl a, kan tan chu chu a tawk lo. Midang thusawiin min tibuai lo a, ngaihthlak pawh ka tum lo," a ti zui!