100% pe turin player-te ka beisei - Ten Hag

Erik ten Hag chuan Manchester United manager hna a thawh ṭan hnua a vawi khat nan thuthar thehdarhtute a kawm a, Dutch manager hian Old Trafford a pan vanga hming ṭhatna dinhmun a derthawn phah loh thu a sawi bakah player-te aṭanga 100% an pek a beisei thu a sawi chhuak.

German manager Ralf Rangnick chu thurawn petuah a ṭang chhunzawm dawn a, thu tawp erawh Ten Hag-a'n a siam dawn. Dutch manager chuan, "Keimahin ka inzir a, thil thlen dan ka chhut kual ang a, mi ṭhahnem tak ngaihdan ka la ang. A tawpa thutlukna siamtu tur chu keimah ka ni. Rangnick-a hna chungchang erawh club thutlukna a ni," tiin a sawi a, German manager hi hmun pawimawh chantir a tum lo niin a lang.

Hmabak hautak chu
Kum 52 mi Ten Hag hi Sir Alex Ferguson-a'n kum 2013-a manager hna a chawlhsan hnua Manchester United-in manager nghet panga an neihna a ni a, hmabak pawh a hautak hle.

Man United hian season liam ta khan 58 points chiah an hmu a, goal 57 chiah khungin goal 57 zet an chhuah a, an goal difference pawh 'zero' a ni. Season tharah Man United hian Champions League an khel dawn lo a, Brighton & Hove Albion puihnain Europa League an khel hram dawn.

Dutch manager Ten Hag chuan, "Tunah tak hi chuan kan dinhmun a ṭha lo. Chona lian tak kan hmachhawn dawn. Team ṭha tak din a, result nei thei tura buatsaih ka duh. Chubakah chuan Theatre of Dreams-ah kan khel dawn a, football hmuhnawm phochhuah ka duh. Chutihrualin football hmuhnawm kan phochhuah loh ṭumah pawh kan chak zel a ṭul," tiin a sawi.

Ten Hag hian hlawhtling takin Ajax a enkawl a, season li chhungin vawi thum league nomawi a chawipui. An champion loh ṭumah pawh hian Ajax hi hmahruaitu an ni a, Covid-19 vangin an inkhel zo lo.

Ajax hian Dutch manager hnuaiah hian Dutch Cup vawi hnih an chawi bawk a, Champions League-ah pawh result ṭha an nei. 2018–19 season khan Ajax-in semifinal an lut hial a, season liam ta pawh khan group stage-ah point 18 hmuin an khingpui an hneh vek.

Pep leh Klopp chotu
Mahse, Premier League-ah erawh Pep Guardiola leh Jurgen Klopp ten team ṭha tak an din tawh a, Man City leh Liverpool inthuam ṭha sa nena inel hi hna hautak a ni dawn. Old Trafford-ah hian David Moyes, Louis van Gaal, Jose Mourinho leh Ole Gunnar Solskjaer te an hlawhchham tawh a, Ten Hag tan pawh mualpho theihna a ni.

Ten Hag chuan, "Tun dinhmunah chuan Pep leh Jurgen te hi ka ngaisang ve ve. Football hmuhnawm an pho chhuak a, mahse an hun tihtawp hi kan tum tur a ni. Team ṭha pahnih elpui thei turin team din kan tum a, club dang pawhin an châk ngei ang," tiin Man City leh Reds elpui theih a beisei thu a sawi.

Football a hmasa ber
Man United leh Ten Hag sawizawm an nih lai khan Dutch manager tawnhriat nei ṭha ber zinga mi Louis van Gaal chuan Man United chu football club ni loin sumdawnna club a nih thu a sawi. Van Gaal hian 2014 leh 2016 chhung khan United hi a enkawl a, FA Cup a chawipui.

Ten Hag chuan, "Van Gaal-a thusawi kha ka hria a, mahse ngaihdan chu keimahin ka siam ang. Man United hian football hi an dah hmasa ber a, pahnihna leh pathumna pawh football tho a ni.

"Tunlai chhanah chuan club zawng zawngin sumdawnna an ngai pawimawh. Hmasawn tur chuan sum lakluh ṭhat a ṭul a, chutihrualin Man United tan chuan football hi pakhatna, pahnihna leh pathumna a ni," tiin Van Gaal-a thusawi a ṭawmpui loh thu a sawi.

Ronaldo a tel
Dutch manager Ten Hag hian Man United dinhmun a zirchiang mek a, chumi mil chuan nipui bazarah player an lalut dawn. Ten Hag hian Ajax a champion pui zawhah chawlh la loin Manchester hi a pan nghal a, player chungchangah thutlukna a la siam fel lo.

Man United manager Ten Hag chuan, "Hmachhawp lian tak kan nei a, hun erawh kan nei rei lo. Tuna player-te nena thawh ho hi ka châk. Tun season hma chiah khan pahnihna an ni thei a, theihna a awm tih chu a chiang. Hma kan sawn tir thei a nih chuan tun season aia result ṭha zawk chu kan nei ngei ang," tiin a sawi.

Captain Harry Maguire chungchang sawiin Ten Hag chuan, "Season thar chu a danglam dawn a, tun season-ah pawh hna ṭha tak a thawk. Player ṭha tak a ni a, sulhnu ṭha tak a nei tawh. Thawh ho a châkawm tawh," tiin a sawi a, captain atan a hman nawn tur thu erawh a sawi lo.

Tun season-a Man United top scorer Cristiano Ronaldo (24 goals) chungchang sawi zuiin Ten Hag chuan, "Ka hmachhawpah a tel a, a chungchang in bula kan sawi hmain amah nen kan inbia ang," tiin a sawi.

Man United hian season hmang ṭha lo mah se nikum nipui khan player an lalut hrawl hle. Borussia Dortmund aṭangin pound maktaduai 72-in Jadon Sancho an lalut a, Ronaldo leh Raphael Varane te an lalut bawk.

Club neitu Avram Glazer pawhin, "Kan mamawh ang player lakluh nan sum chu kan hmang ziah. Chuvangin kan result hi a lungawi thlak loh. Kan dinhmun siam ṭha turin Ten Hag hi kan lalut a, hna ṭha tak a thawh kan beisei a ni," tiin Dutch manager lakah rinna sang tak an nghah thu a sawi.