Celtics leh Heat an inchai tawk

NBA Eastern Conference champion tur zawk hriatthiam a la harsa hle. Nimin zing game 4 inkhelah Boston Celtics chuan Miami Heat lakah 102-82 in hnehna an chang a, best of seven series khelh laiah team pahnih hi 2-2 in an inhnehtawk mek.

Jayson Tatum-a'n match hmasa lama a khelh tawk lohna a siamṭha a, a tir aṭangin a nung nghal vet vet hle. Celtics forward hian point 31 a neih bakah rebound vawi riat a la a, a ṭhiante tan assist vawi nga a nei bawk - an chak theihna hnar a ni.

Kum 24 mi Tatum chuan, "Point ka nei tam emaw ka nei tlem emaw pawh ni a, team tan ka ṭangkai em, tih hi a pawimawh ber chu a ni. Boston Celtics chak pui hi ka hna a ni a, tun ṭuma ka tihlawhtling thei hi ka lawm," a ti.

Celtics hian quarter hmasa berah 29-11 zetin hma an hruai fal, a bul an ṭan fuh em avangin harsatna lian tham an tawk lo. Tatum-a bakah Jaylen Brown, Robert Williams III, Derrick White leh Payton Richard ten point 10 chuang an nei ve bawk.

Boston Celtics coach Ime Udoka chuan, "Heat tana inkhel bul ṭantu zingah point 10 nei tling an awm lo, point neih chauh ni loin mahni basket kan venghim ṭha hle tih a chiang," tiin a naute khelh dana a lungawi thu a sawi.

May 26, Ningani zing dar 6:00-ah game 5 an khelh chhunzawm leh dawn, game hnih ve ve an lak tawh avangin a tlem berah game 6 chu an khelh tlin a ngai dawn tih a chiang tawh.

Eastern Conference Finals
Game 1: Miami Heat 118 - 107 Boston Celtics
Game 2: Miami Heat 102 - 127 Boston Celtics
Game 3: Boston Celtics 103 - 109 Miami Heat
Game 4: Boston Celtics 102 - 82 Miami Heat
May 26, Ningani
Game 5: Miami Heat 06:00 AM Boston Celtics
May 28, Inrinni
Game 6: Boston Celtics 06:00 AM Miami Heat
May 30, Thawhṭanni
Game 7: Miami Heat 06:00 AM Boston Celtics
(Series-ah 2-2 in an inhnehtawk mek)

Western Conference Finals
Game 1: Golden State Warriors 112 - 87 Dallas Mavericks
Game 2: Golden State Warriors 126 - 117 Dallas Mavericks
Game 3: Dallas Mavericks 100 - 109 Golden State Warriors
May 25, Nilaini
Game 4: Dallas Mavericks 06:30 AM Golden State Warriors
(Golden State hian series-ah 3-0 in hma an hruai)
Note: Best of seven series hmangin chak zawk zawn tur a ni)