Wimbledon hi exhibition match ang a ni dawn - Osaka

French Open aṭanga a tlak hnuah Noami Osaka chu Wimbledon chungchang an zawt a, world ranking tel loa tournament khelh chu awmze nei lo, exhibition match ang mai a nih avangin a inlan dawn nge dawn lo tih a la sawi chiang thei lo, tih a sawi.

Grand Slam vawi li champion tawh Osaka hi Paris khawpuia a match hmasa berah Amanda Anisimova hneh loin a tla, clay court inelna neih laiah hian 7-5, 6-4 in a chak lo zawkah a ṭang.

French Open aṭanga a tlak aiin Wimbledon a sawi dan chuan sawi zui a hlawh. Russia leh Ukraine buaina vangin Russian leh Belarus player-ten Wimbledon an khel thei dawn lo a, hei hian titi a titam bawk.

Mipa leh hmeichhe tennis thuneitu sang ATP leh WTA te chuan Lawn Tennis Club thutlukna hi an pawm thei lo, ram ṭhenkhat hrem an nih avangin grass court inelna lianah hian world ranking a awm lo ang, tiin thu an tichhuak ve nghal a ni.

Tennis tournament hi world ranking mila siam ṭhin a ni a, ranking sang a pawimawh. World number 1 ni rei thei chu chawimawina a ni a, number 1 ni chunga season khar pawh inchhuanna tham a ni - Wimbledon erawhin ranking a nei thei dawn lo.

Japanese nula Osaka chuan, "Indo chu ka duh bik lo, tuna thil an tih dan erawh buaina chinfelna a ni bik chuang lo. Ranking point tel loa inkhelh chu exhibition ang a ni mai a, chuvangin thutlukna ka la siam thei rih lo.

"Inkhelh satliah ang a nih dawn avangin ka tel ngei ang tih pawh 100% chuan ka la sawi thei lo, boruak inlumleh dan ka chhut tel ang," a ti. Tennis player langsar zingah Wimbledon thutlukna thlawptu an la awm rih lem lo a ni.

World number 1 hlui Osaka chak lo mah se, number 1 ni lai Iga Swiatek erawh a chak nuamsa hle a, champion lai Barbora Krejcikova erawh beisei phak loin first round lekah a zinkawng a tawp nghal.

Poland nula Swiatek hian minute 54 chhung lekin Lesia Tsurenko chu 6-2, 6-0 in a hneh, Ukrainian player a hneh takah chuan tun hnaiah match 29 zet a zawnin a chak ta, inelna neih laiah pawh champion tura rinkai ber a ni.

Inkhel dangah Barbora Krejcikova chu kum 19 mi chauh Diane Parry lakah 1-6, 6-2, 6-3 in a chak lo. Czech nula Krejcikova-i'n season hmasa khan rin loh takin nomawi a chawi a, kuminah erawh a mumang a chhunzawm thei ta lo.

Hming langsar zingah US Open champion hlui Bianca Andreescu, world number 1 hlui Angelique Kerber leh 2020 semifinalist Petra Kvitova te an chak a, seeded pangana Anett Kontaveit erawh Ajla Tomljanovic lakah 7-6 (7-5), 7-5 in a tlawm nghal.