Man City-in champion an lawm

Premier League champion Manchester City chuan Thawhṭanni khan season nga chhunga vawi li an champion-na an lawm a, Premier League nomawi nen khawpui an fang.

Man City hian bus chunga khawpui an fan hnuah Manchester-a kawng lian ṭha lai Deansgate-ah a tawp an khar a, helai hmunah hian stage siamin champion team an pho chhuak.

Spanish manager Pep Guardiola chuan, "Khawvela league harsa ber a ni a, ka awm hnuah ṭum li kan champion ta. Min ṭantute hmel aṭangin hlimna ka hmu thei a ni," tiin a sawi.

Man City champion parade-ah hian City ṭantu sang chuang an pung khawm a, an hlawhtlinna ropui tak an lawm. Premier League hi ṭum 30 neih a ni tawh a, Manchester United chu vawi 13 champion tawhin record an nei ṭha fal. Amaherawhchu City hian nomawi vawi ruk an chawi tawh a, Pep Guardiola hi a cham rei a nih chuan Man United record hi a him lo ang.