Zaninah IPL eliminator Lucknow Super Giants Vs Royal Challengers Bangalore

Zanin dar 7:30 hian Indian Premier League-ah Lucknow Super Giants leh Royal Challengers Bangalore te an inkhel dawn. Eden Gardens-a inkhel tur hi Eliminator tih a ni a, heta chak zawk hian nizana Gujarat Titans leh Rajasthan Royals inkhela chak lo zawk nen final khel tur an zawng leh ang.

Tu nge rinkai zawk?
IPL league table aṭanga thlir chuan Lucknow Super Giants hi Royal Challengers Bangalore aiin an dinhmun a ṭha hret a, match khatin an khel tam zawk. Zaninah pawh hian table-a dinhmun sang zawka ding Super Giants hi rinkai zawkah a ngaih theih.

Chutihrualin team pahnih hi an inkhelh tawhna aṭanga thlir chuan Bangalore hi an dinhmun a ṭha zawk. April 19 khan Navi Mumbai-ah team pahnih an inkhel a, Bangalore hi 18 runs-in an chak.

Bangalore hian an bat hmasa a, Faf du Plessis-a'n 96 runs a siam zarah 181/6 runs an siam. Super Giants-in over 20 chhungin 163/8 runs chauh an siam a, Krunal Pandya (42) chet ṭhat chu chak nan a tawk zo lo.

Eliminator chu
IPL playoff kalpui dan hi football lama an kalpui dan nen a inang lo. Indian Super League leh Mizoram Premier League-ah te chuan league round khelh zawhah a sang paliin semifinal an lut a, pakhatna leh palina inkhelin pahnihna leh pathumna te an inhmachhawn bawk. Semifinal-a chak zawk hian final an lut mai a, semifinal lut chin chu palina pawh ni mah se pakhatna nen an dinhmun a inang vek.

IPL-ah erawh pakhatna leh pahnihna te dinhmun a ṭha a, a sang pahnih hian qualifier 1 khelin a chak zawkin final an lut. A chak zo lo tan pawh final luhna kawng a la inhawng a, eliminator-a chak zawn nen qualifier 2-ah final khel tur an zawng leh dawn.

Eliminator-ah hian pathumna leh palina an inkhel a, final khel turin match hnih chak a ngai. Mi nawlpui hriatthiam dan tur chuan eliminator hi quarterfinal angah a chhal theih a, final thleng turin match hnih chak a ngai a ni.

En châkawm
Bangalore hmachhuan tur chu KL Rahul leh Quinton de Kock te an ni a, India leh South Africa batter hian season ṭha tak an hmang a, 500 runs siam tling mi pathum zingah an tel. KL Rahul hian 537 runs a siam a, run siam tam ber Jos Buttler aiin a strike rate a ṭha zawk.

Bangalore tan South Africa batter Faf du Plessis a che ṭha a, 443 runs a siam. Wicket keeper Dinesh Karthik pawhin 287 runs a siam a, India captain hlui Virat Kohli hming lam hmaih a thiang lo bawk.

Kohli hi season tirah a che ṭha tawk lo a, sawiselna pawh a tawk nasa. Mahse, player ṭha bik hian a thiam a la theihngilh lo tih a pholang. Match hnuhnung bera Gujarat Titans an hneh ṭum pawhin 73 runs a siam a, semifinal an khelh theihna chhan a ni. Kohli hian tun inelnaah 309 runs a siam tawh a, player theihna nei sang hian IPL nomawi a la chawi loh avangin zanin inkhelah hian a theihna zawng zawng a chhuah ang.