Blue Tigers-ah Mizo tan hmun a awm lo

India coach Igor Stimac chuan May 28-a Jordan nena friendly match khel tur India squad a puang a, player 25 thlanchhuah zingah Mizo player an tel lo.

Blue Tigers hi June thlaa AFC Asian Cup final round qualifier khel turin an inbuatsaih mek a, April 19 khan Stimac chuan mi 41 awmna probable squad a lo puang tawh.

Player 41 zingah hian Kerala Blasters midfielder K. Lalṭhathanga (Puitea), ISL player man to ber Lalengmawia (Apuia) leh Mumbai City forward Lallianzuala Chhangte te chu koh an ni.

Mahse, nimina player 25 hmingah Mizo hming a lang lo - Lianzuala hian India squad hi a zawm lo a, Mumbai City midfielder Apuia hi a inhliam thung.

India team probable squad hian April 23 aṭang khan Bellary leh Kolkata-ah training an nei ṭan tawh a, ATK Mohun Bagan, Hero I-League & Hero Santosh Trophy All-Star team leh West Bengal team te nen practice match an khel bawk.

I League & Santosh Trophy All-Star team-ah hian Sreenidi Deccan defender Lalchungnunga, Mohammedan SC defender Lalramchullova leh RoundGlass Punjab midfielder Freddy Lallawmawma te pawh India hmachhawn hian an inlan a ni.

India squad-a player 25 thlanchhuahte hian nimin khan Doha lam panin India an chhuahsan a, Jordan nen an inkhelh hma zawng Doha-ah hian training an neih chhunzawm ang.

Jordan nen an inkhelh zawhah India hi May 30-ah India-ah an lo kir leh ang a, AFC Asian Cup final round qualifier atan an inbuatsaih chhunzawm dawn a ni.

Asian Cup qualifier-ah hian India hi group D-ah an awm a, Hong Kong, Afghanistan leh Cambodia te nen an awm ho - Kolkata-ah vek inkhel tur an nih avangin chance a ṭha hle.

Kum 2023-a khelh tur Asian Cup hi China thlen tura tih a ni a, mahse, China hi tun hnai khan Covid-19 vangin an inhnukdawk a, Asian Cup thleng tur hi thlan chawp leh tur a ni.

India Squad
Goalkeepers: Gurpreet Singh Sandhu, Laxmikanth Kattimani, Amrinder Singh.
Defenders: Rahul Bheke, Akash Mishra, Harmanjot Singh Khabra, Roshan Singh, Anwar Ali, Sandesh Jhingan, Subhashish Bose, Pritam Kotal.
Midfielders: Jeakson Singh, Anirudh Thapa, Glan Martins, Brandon Fernandes, Ritwik Das, Udanta Singh, Yasir Mohammad, Sahal Abdul Samad, Suresh Wangjam, Ashique Kuruniyan, Liston Colaco.
Forwards: Ishan Pandita, Sunil Chhetri, Manvir Singh.