European football khelh zel duh Suarez

Luis Suarez chuan Diego Simeone nen a hma hun an sawi dun loh thu a sawi a, season tharah inelna sang hmachhawn turin European football khelh chhunzawm a la duh thu a sawi lang tel bawk.

Uruguay internatonal striker hian Atletico Madrid a chhuahsan dawn, kum 35 mi niin a vanglai pel tawh mah se sawmtu a la ngah. Argentina, Brazil leh Mexico club aṭangin sawmna a la dawng.

Suarez chuan, "Rafa Alique (Atletico director of communications) khan match hnuhnung ber kan khelh tur kha min thlahna tur a nih thu min hrilh, a hmain engmah ka hre lawk lo, min barakaih zawk hial.

"Kum 35 mi ka ni tawh a, ka hma hun pawh ṭha takin kan sawi turah ka ngai. Nikum December thla khan club nen kan inbia, kan inbiak dan chuan February thlaah kan inbe leh ang tih a ni, mahse chutiang chu a thleng lo," a ti.

Atletico manager Simeone nen in inbia em? tih zawhna chhang zuiin Suarez chuan, "Kan inbe lem lo," a ti. A hma hun sawi zawm nghalin, "Tunah hian season thara ka khelhna tur pawh ka la tichiang thei lo.

"Argentina, Brazil leh Mexico club ṭhenkhat chuan an hnena khel turin min sawm, mahse European football khelh ka la duh, a hmun tur erawh ka la sawi thei lo," tiin a sawi.

Barcelona striker hlui hian Atletico tan season hnih a khel a, inelna hrang hrangah match 83 khelin goal 34 a khungsak. Season hmasa khan La Liga-ah goal 21 khungin a champion pui a, a thil tih hi an hre reng tawh ang.