Sevilla beiseina a nung

Season thara Champions League khelh tum Sevilla chuan an thil tumah an ti mai mai lo tih khelmual lamah an pholan chhunzawm zel a, an mikhualna ramah Athletic Bilbao chu 2-1 in an hneh. 

Athletic tan hian Ander Capa chuan minute 29-na lekah goal hmahruai a khung a, first half chhungin goal dang a lut lo. Top four ni tura Sevilla elpui Villarreal ṭantu ten lawmna kut lo beng hman mah se an hlim chhung a rei lo.

Sevilla tan Ever Banega chuan minute 69-naah freekick mawi bik hmangin an si phurh a rawn sut a, an la duhtawk mai lo. Point thum hmuh ngei tumin Sevilla-in an bei zui a, Munir El Haddadi chuan minute 74-naah chakna goal a khung. 

Real Madrid boss hlui Julen Lopetegui enkawlna hnuaia khel Sevilla-in hnehna an chan avangin khelh zat inangah pathumna Atletico Madrid nen an point hmuh zat a inang a, season thara Europa League khelh tum Athletic Bilbao dinhmun a chhe ta hle thung. Spanish La Liga-ah palina chin hi Champions League khel tura tling tur an ni a, pangana hi Europa League group stage khel turin an tling ṭhin thung. Parukna hi Europa League second qualifying round khel turin an tling ang. Bilbao hi table-ah pakuana an ni mek a, parukna Getafe chu khelh zat inangah point ngain an phak lo mek.