Kawr sen nen RG Stadium-ah Mizo mipui leh AFC Vs Chennai City

Aizawl FC-in vawiin tlai dar 2:05-a Chennai City an hneh a nih chuan I League hmahruaitu an ni dawn a, pakhatna an nih hun chhung erawh inkhel dang result azir a ni ang.

Mizo club hi India ram club inelna sang bera champion thei dinhmunah an ding chho ṭan ta a, Mizo mipui tan si ruk laa thawhchhuah hun chiah a ni.

Hma ila, Sen ila
Mizo club-in an match hnu­hnung berah hmahruaitu East Bengal chu 1-0 in RG Stadium-ah an hneh a, Aizawl FC-in Kolkata club lian an hneh theih tawh ber chuan Khalid Jamil-a hote hian nomawi chawi thei tur zinga chhiar tel hi an phu ṭan ta.

Red and Gold hneh turin Mizo mipui an thawk chhuak a, amah­erawhchu inkhel en tura kal hma nachang hre lo an tam avangin mi ṭhahnem takin inkhel hi a bul aṭangin an en thei lo. Chennai City nena an inkhelh hun hi Inrinni a nih avangin traffic jam vanga buaina pumpelh theih dan chu kal hma a ni.

Aizawl FC hian tun season-ah champion tura an elpui Mohun Bagan an hneh tawh lo a, an ngam loh pakhat dang leh chu vawiina an hmachhawn tur Chennai City hi an ni.

South Indian club hi table hnuai lamah awm mah se team ṭha an ni a, Mizo club-in an muala dinhmun ṭha zawka an din theih nan kawr sen nen Mizo mipui an thawhchhuah a ṭul. Aizawl FC jersey nei lo pawhin kawr sen nen ṭawiawm hram thei se tiin AFC hruaitute chuan mipui an sawm.

Lam ila, beng ila
Lawm hun a awm a, ṭan hun a awm. Vawiin hi lawm huna chantir theitu chu Mizo mipui an ni a, 'Aizawl FC i ṭan chuan kut beng rawh' tia an au ṭhup ṭhup lai a, kut beng lo bik nih kha a fuh lo - ben rual ṭhup ṭhup tawh mai tur.

East Bengal nen Aizawl FC inkhel en tura kalkhawm mipui­in 'Mexican Wave' an siam a, en­tu mipui tan inkhel en a nawm phah sawt a, India rama football ngaina­tute pawhin video hmanga an en hnuah ropui an ti. Amaherawhchu 'wave' pawh hi a hma aia fawn nasa zawkin a siam theih a, mipui lamin ban phar satliah loa an din suau a ngai thung ang.

Mizo ṭan tur AFC
Aizawl FC defender Lalruat­thara chu khup hliam vangin East Bengal nen lakchhuah a ni a, Cham­phai defender hi match li chhung chu a inlan theih a rinawm loh.

Amaherawhchu Red and Gold hmachhawn thei lo Ashutosh Mehta a dam tawh a, defender dang pathum Lalramchullova, Zohmingliana Ralte leh Eze Kingsley te an dam ṭhat avangin tlar hnungah buaina tur a awm lo.

Mizo club-in inthuam chak nan MPL best midfielder Lalruatfela Zote an lalut a, Republic Veng­thlang tlangval hi dam chian loh vangin chhawr theih a la ni lo. Khalid Jamil tana thu lawmawm erawh tlarhma player dang chhawr theih vek an ni.

Ivorian forward Kamo Stephane Baye, Syrian midfielder Mahmoud Al Amna, Liberian midfielder Alfred Kemah Jaryan leh Jayesh Rane te an fit ṭha.

East Bengal laka chakna goal khungtu R. Laldanmawia leh goal hnih khung tawh Brandon VL Remdika ten training ṭha takin an zawm a, heng player pahnih thlakna tur hian H. Lalmuankima a dam ṭha tawh bawk.

Sawmfela telna
Ramhlun South tlangval Mal­sawmfela'n MPL5-ah goal 11 a khung a, Chanmari FC champion puiin best player leh best forward-ah thlan a ni.

Mizo forward zinga hming langsar ber zinga mi Sawmfela hian foreign striker chak karah Chennai City-ah khelhna hmun chan a harsat a, hei hian Aizawl FC hmachhawn tur South Indian team hi an ṭha thawkhat tih a nemnghet.

Chennai City coach Soun­dararajan chuan, "Aizawl FC nen Mawitea'n inkhel bul a ṭan dawn a, Mizo dang erawh ka la sawi thei lo," a ti. Sawmfela bakah Bethlehem Vengthlang FC player hlui pahnih Lalnunmawia leh Liandala (Sena) te an rawn zin tel a ni.

Zuam chi loh!
Chennai City hi I League-ah team thar an ni a, match 10 khelh aṭangin point riat chiah an la hmu bawk. Amaherawhchu AFC khingpui tur team hian players an khawm chhe lo.

Tamil coach Soundararajan chuan, "Foreigner pali bakah ISL player pakua kan nei a, Aizawl FC hi kan mualah kan hneh tawh bawk. Point hmuh beisein Mizoram kan rawn pan a, amaherawhchu an phur vanglai tak a nih avangin keini aiin rilru lamah an inpeih zawk," tiin Mizo club an huphurh bik loh thu a sawi.

Chennai-in ISL club Chennaiyin FC an nei a, Jeje Lalpekhlua khelhna club aṭang hian Chennai City-in goalkeeper Karanjit Singh, defender Abhishek Das bakah midfielder pahnih Dhanpal Ganesh leh Zakeer Mundampara te an hawh a. Tamil Nadu chhuanvawr Dharmaraj Ravanan chu Pune City aṭangin an hawh bawk.

Mizo club tana thu lawmawm chu Brazilian forward Marcos Tank leh Afghan defender ṭha Zohib Islam Amiri te awm lo tur hi a ni.

AFC coach Khalid Jamil chuan, "Player ṭha pahnih hi player ṭha dang pahnihin an thlak leh mai dawn a, lawmna tur a awm lo," tiin a ṭawng fimkhur hle.

Mikhual team hian Brazilian forward Charles leh Nigerian defender Echezona Anyichie te an la nei tho a, player an len ṭhat avangin Mizo club tan khelh an harsa ang.

Kan ṭang dawn
Aizawl FC winger Brandon VL Remdika chuan, "Entu tama inkhelh a nuam zawk a, ṭantu kan neih ṭhat chuan inkhelh a nuam. Chennai City kan hmachhawn hunah pawh ṭha takin min ṭawiawm ula, theihtawp chhuahin kan lo khel ang," tiin press conference-ah a sawi.

Mizo club hian RG Stadium-ah match thum chiah khelh tur an nei tawh a, Chennai City zawh hian February 4-ah Mumbai FC an mikhual ang.

Aizawl FC-in an muala an hmachhawn hnuhnun ber tur chu Mohun Bagan a ni a, inkhelh hun a la chiang lo.