Mizoram an champion

Khelo India-ah Mizoram junior team-in nimin khan West Bengal hnehin an champion.

JN Stadium, Chennai-a final khelhah goal a lut lo a, Mizoram keeper Alex K. Malsawmkima'n penalty shootout-ah vawi khat dangin Mizo rawlthar panga Lalruatfela, Lalmalsawmtluanga, Lalhmachhuana, F. Malsawmzuala leh Vannunmawia ten pet goal vekin 5-4 in hnehna a chang.

Mizoram hian inelna match hmasa berah West Bengal hi goal awm loin an draw tawh a, hemi hnu hian Punjab (1-0), Pondicherry (5-0), leh Madhya Pradesh (1-0) te hnehin knockout stage an lut.

Quarterfinal-ah Mizoramin Chattisgarh 6-1 in an sawp a, semifinal-ah Lalruatfela goal hmang-in Kerala 1-1 in an inhnehtawk a, penalty shootout-ah 3-1 in an chak.

Mizoram hian an tlar hnung neih ṭhat an champion pui a, inelna pumpuiah goal hnih chiah an chhuah.Durtlang rawlthar Lalruatfela'n goal riat a khung a, Republic Veng rawlthar Lalmalsawmtluanga inhliam vanga match hnih a inlan lo chungin goal li a khung ve bawk.

Mizoram coach Samuel Lalrinngheta chuan, "Pathian vang liau liau a ni a, kan ṭawngṭaina chhanin a awm a ni. Final-a kan khingpui West Bengal hi keini aiin an lian zawk a, thiamnaah pawh an sang hretin ka hria, chu ti chung chuan hnehna kan chang a ni," tiin Vanglaini palai a hrilh. Bungkawn tlangval Samuel-a hian Mizoram team a enkawl hmasak berah a champion pui nghal a ni.

Khelo India-ah hian Mizoram hmeichhe team pawh an inlan a, group stage an paltlang lo.