Real Betis-ah Pellegrini

Spanish La Liga club Real Betis chuan an manager atan Manuel Pellegrini an lakluh thu an puang. Manchester City leh West Ham pawh enkawl tawhtu hian season thar aṭangin Betis hi a enkawl ṭan ang - kum 2023 June thla thleng daih contract a ziak.

Kum 66 mi Pellegrini hi Spanish football-ah a mikhual dawn lo, tun hmain Real Madrid, Villareal leh Malaga a enkawl tawh. Nikum December thla khan Premier League club Hammers-in an ban a, a hnu lamah hna a la nei leh rih lo a ni.Betis chuan thu chhuah siamin, "Manager tawnhriat nei ṭha tak nen season thum daih contract kan ziak, kan tan leh a tan pawh chanchin lawmawm a nih kan beisei. Hmathlir thui tak neiin thil kan ti a, beiseina pawh a sang hle," an ti. June 21 khan Betis hi Athletic Bilbao lakah an tlawm a, coach Joan Francesc 'Rubi' an ban. Tun season khelh hmabak an la neihah chuan sports director Alexis Trujillo-a'n a kaihruai chhunzawm ang.