Pathianni zanah EFL Cup Final
Jose Mourinho-a'n nomawi a keng tel an ti ṭhin a, Portuguese manager hian Manchester United-in an lakluh chhan tihhlawhtlin a tum dawn. Pathianni zan dar 10 hian Wembley Stadium-ah United leh Southampton ten EFL Cup final an khel dawn a, Ten 2-ah a en theih ang.
Final kalkawng
Manchester United-in final thleng turin League One club Northampton Town (3-1), an hmelma leh champion lai Manchester City (1-0), West Ham (4-1) leh Hull City (3-2) te an hneh. Semifinal-ah hian second leg-ah Tigers chu 1-2 in an hneh lo a, match 17 chhung hneh loh tawng tawh lo Mourinho hote kal ṭha tluang a tawp bawk.
Southampton-in Wembley Stadium thleng turin Premier League club vek an hneh bakah goal an la chhuah lo. Claude Puel-a hote hian Crystal Palace (2-0), Sunderland (1-0), Arsenal (2-0) leh Liverpool (2-0) in an hneh. United hmelma Gunners leh Reds hneh thei Saints hi team ṭha an ni a, Mourinho naute tan zuam chi an ni lo.
Nomawi a hlu
League Cup-ah Southampton hi an la champion ngai lo a, final an thlen awmchhun chu kum 1979 kha niin Nottingham Forest chu 3-2 in an hneh lo. FA Cup-ah kum 1976 khan Saints hi an champion a, 2003 khan final lut lehin Arsenal an hneh lo a, kum 41 chhung nomawi lian tham chawi loin hun an hmang ral tawh.
United erawh League Cup an chawi hnuhnun ber pawh kum 2010 chauh kha a la ni a, EFL Cup bikah nomawi pangana an beisei mek. Jose Mourinho-a'n English club a enkawl a, a champion hmasak ber chu League Cup a ni a, Portuguese manager hian Chelsea a enkawl laiin League Cup nomawi vawi thum a chawi hman.
Ibra vs Gabbiadini
Manchester United-in Zlatan Ibrahimovic an nei a, Swede forward hi kum 35-a upa ni tawh mah se tun season-ah match 37 khelin goal 24 a khung tawh.
Southampton-in January thlaah Napoli aṭangin pound maktaduai 14-in Manolo Gabbiadini an lalut ve bawk a, Italian striker hian Saints tan league match hnih lekah goal thum a khung tawh. Final-ah goal khung thei striker an pawimawh dawn a, Zlatan leh Gabbiadini te enbik an sual lo ang.