King Claudio a liam ta Leicester-in Ranieri an ban

Khawvel rin phak loh thlentir a, infiamna chanchina hriatreng tawh tur thlentirtu, Premier League-a Leicester City champion puitu Claudio Ranieri chu Premier League nomawi a chawi aṭanga thla kua a liam meuh chuan ban a ni - football khawvelin a hrethiam lo.

Season hmasa ṭantirh khan pawisa inchawinaa Foxes champion odds chu 5000/1 a ni a, chumi awmzia chu Lei­cester champion tura Re 1 dah chuan season tawpa nomawi an chawi chuan Rs 5000 an dawng dawn tihna a ni. Pawisa thapna buatsaihtute hian Foxes hi champion turin an ring lo bur tihna a ni a, club 20 zinga a ṭha ber an nih theih dan chu .0002 percent chauh a ni - Mahse, khawvelin theih loh nia a hriat chu Ranieri hian a thlentir a, tunah erawh a 'na' thei ang berin a chawisan club chuan an hnuchhawn leh si.

Leicester chuan thuchhuah siamin, "He thutlukna siam hi harsa hle mah se club tana ṭha ber tur ngaihtuah chunga kan siam a ngai si a ni," an ti a, Premier League tlak hlauhawm dinhmuna an din mek vanga Italian manager ban an nih thu an sawi.

Eng vang nge?

Ranieri banna thu hi Cham­pions League last 16 first leg-a Sevilla 2-1 a an ngam loh aṭanga darkar 24 hnuah puan a ni a, Spain-a an zin hma hian Foxes hotute hian thutlukna an siam fel diam tawh nia ngaih a ni.

Foxes hian season hmasa khan point 10-a sang fal chungin Premier League nomawi an chawi a, tun season-ah erawh vawi nga chiah league match-ah hnehna ala chanpui. Foxes hi season tawpah relegate se chuan kum 1938 hnua champion lai an relegate leh hmasa ber a ni dawn a, he thil hi Leicester hian hlauh vangin Ranieri hi an ban.

Leicester hi an league match hnuhnung pangaah an tlawm vek a, English top four division club zinga kum 2017-a goal la khung miah lo awmchhun an ni bawk.

A na a ni

Foxes chuan, "Ranieri hi Leicester manager awm tawh zinga hlawhtling ber a ni tih kan hai bik lo. Mahse, league lama kan dinhmun thlirin kan dinhmun a him lo niin kan hre si a ni," tiin thlutlukna harsa tak an siam thu an sawi a, Leicester striker hlui Gary Lineker rilru erawh a hmin phah lo.

England legend chuan, "Cluadio Ranieri-a'n Leicester tana hna a lo thawh tawh zawng zawng thlirin he thutlukna hi hrilhfiah theih a ni lo a, ngaihdam theih pawh a ni lo a, a lungchhiatthlak takzet a ni," a ti.

BBC sports editor Dan Roan chuan, "Ranieri hi Ningani tlai khan ban a nih thu hrilh a ni a, hei hi Spain aṭanga a lo kir hnu lawkah a ni. Leicester hotute hian Sevilla an hmachhawn hma khan thutlukna hi an siam tawh," a ti a, Foxes hotute chuan him an duh miau avangin inthlahrung tak siin thutlukna chu an siam niin a sawi.

Leicester thukhawchang

Leicester City vice-chairman Aiyawatt Srivaddhanaprabha chuan, "King Power Stadium-a kum sarih dawn neitu nihna kan chelh hnua thutlukna harsa ber a ni. Vawiinah hian kan thinlung leh rilru duhna aiin club tana ṭha tur zawk kan ngaihtuah a ṭul a, mihring inzawmna chu engtianga chak pawh ni se club ngaihtuah chunga thutlukna siam a ngai a ni," a ti.

Srivaddhanaprabha chuan sawi chhunzawmin, "Season hmasaa kan nomawi chawi ang kha kan beisei leh ngam hauh lo a, kan tum ber chu Premier League a inhamtan a ni. Mahse, tunah chuan tla thei dinhmunah kan ding mek a, kan hmabak match 13 khelh tur kan la neih hi a ṭha thei ang bera hman a ṭul a ni," tiin a sawi a, Ranieri chu a hnathawh ropui tak avanga an zah reng tur thu a sawi bawk.

Eng nge an sawi?

Manchester United manager Jose Mourinho chuan instagram lamah Ranieri nena an thlalak dun pholangin, "England champion leh FIFA manager of the year chu ban a ni. Hei hi football khawvel thar chu a ni miau si. Ka ṭhian, hlim tak­in nui reng la, sulhnu ropui tak i hnutchhiah hi tuman an theih­nghilh tawh lo ang," tiin a thlah.

BBC Radio Leicester cor­res­pondent Ian Stringer chuan, "Sevilla-a an inkhel kha a hmunah ka awm a, Jamie Vardy-a'n goal a khung khan an hlim tehreng nen he chanchinthar hi a thleng leh ta si. Ranieri ban a ni hi ka awih thei lo a, thil ropui tak titu Claudio chu a kal takzet maw?," tiin Italian manager ban a ni chu a awih thei lo.

England leh Arsenal legend Ian Wright chuan, "Cluadio an ban tih hriat zet chu a nuam lo hle mai. Leicester player ni ta ila, hrehawm ka tih dan tur hi ka sawithiam lo zawk a ni," tiin Foxes players rilru a hnual phah a rin thu a sawi.

Aston Villa leh Leicester City forward hlui Dion Dublin chuan, "Leicester in thiltihah hian in chiang meuh maw? Premier League nomawi chawi­puitu manager in ban ania," tiin Foxes chu zawhna a zawt a, England, Leicester leh Arsenal striker hlui Alan Smith chuan, "Football chu kan mangṭha a ṭul ta tihna em ni?" tiin Leicester chet dan chu football tana hlutna nei lo niah a ngai.

Leicester-a Ranieri zinkawng
13 July 2015 : Ranieri-a'n Leicester a zawm.
14 February 2016 : Leicester-in 2-1 in Arsenal an ngam lo a, 2015-16 season a tlawm hmel an hmuh hnuhnun ber a ni.
2 May 2016 : Tottenham leh Chelsea inhnehtawk hnuah Foxes chu an club chanchina a vawi khat nan an champion.
16 May 2016 : League Managers' Association Manager of the Year-ah puan a ni.
18 May 2016 : Premier League Manager of the Season-ah an thlang.
16 July 2016 : Leicester champion-na kawnga player pawimawh N'Golo Kante-a'n Chelsea a pan a, season nga chhung atan contract a ziak.
13 August 2016 : Leicester-in 2016-17 season-a an match hmasa berah Hull City chu 2-1 in an ngam lo nghal.
22 November 2016 : Leicester-in Champions League group stage-ah match khat khelh tur la nei chung­in group hmahruaitu dinhmun an luah chiang.
18 December 2016 : Ranieri chu BBC Sports Personality of the Year awards-ah Coach of the Year chawi­mawina pek a ni.
9 January 2017 : FIFA Coach of the Year-ah thlan a ni.
7 February 2017 : Leicester-in an league match hnuhnung 15-a vawi hnih chiah hnehna an chan hnuah Foxes neituten Ranieri chu an thlawp tlat thu an sawi.
22 February 2017 : Foxes-in Champions League last-16 first leg-ah Sevilla 2-1 in an ngam lo.
23 February 2017 : Ranieri ban a ni.