Bengaluru khelmualah East Bengal

Zanin dar 7:05-ah East Bengal chuan Bengaluru an lenchilh dawn a, team pahnihin hnehna chan an duh ve ve dawn avangin inkhel hmuhnawm beisei a sual lo ang. Bengaluru coach Albert Roca-a'n nomawi beiseina a la chuai lo tiin sawi fo mah se a thusawi dikna khelmual chhungah a nauten an lantir thei ṭhin lo a, league match ruk chhung chu chak hmel an hmu tawh lo - a bul ṭanna pawh East Bengal an ni!

Bengaluru hian I League-a an match hmasa pathumah hnehna chang vek mah se khualmuala an match hmasa berah East Bengal hi 2-1 in an ngam lo nghal a, an tho leh tawh lo - match ruk a zawna an tlawm hnuah an khelmuala an inlan ve lehna tur chiah a ni a, an kalkawng kit hnawktu Kolkata club lakah chak loh an duh dawn lo.

East Bengal-in Aizawl an rawn zin ṭumin a vawi khat nan tlawm hmel an hmu nghal a, champion ngei tum team boruak a chhe nghal! Aizawl FC ngam lo East Bengal coach Trevor Morgan-a chungah Kolkata club hotu ṭhenkhat an lungawi lo nia sawi a ni a, Bengaluru lakah hian an tlawm a nih chuan British coach hi kan hmu zui lo a nih pawn a mak lo ang - champion kalkawng dal thei a ni tlat!

I League fixtures
Vawiin Inkhel Tur
Aizawl 02:05 PM Chennai City
Bengaluru 07:05 PM East Bengal
February 26, Pathianni
Churchill Brothers 04:35 PM DSK Shivajians
Mumbai FC 07:05 PM Minerva Punjab