United hmachhawn tur Rostov

Jose Mourinho chuan Europa League last 16 draw neih hmain, "Khingpui harsa tak hmachhawn hi chu kan tawn fo hnu a ni a. Team 16 te hi an ṭha vek a, Champions League aṭanga tla thla te an nih avangin a awlsam dawn lo. Duh thlang thei chu ni ila, last 16 match inkarah Chelsea kan hmachhawn dawn avangin zin hlat loh ka duh," tiin duhthu a sam a, amaherawhchu Portuguese manager duhthum a thleng dik lo.

Nimin tlaia last 16 fixture pawhah Manchester United hi Russian club FC Rostov nen pawh fuh an ni a, March 9-a an zin chhuah hunah 3432 km vel zeta hlaah an zin a ṭul dawn a ni. Pla­yer neih ṭhat dan aṭanga ṭanga thlir chuan United hi chak tura rinkai an ni ang.

French club Lyon chuan Serie A table-a pahnihna AS Roma an mikhual hmasa dawn a, Bundesliga club pahnih Schalke leh Borussia Monchengladbach te an inhmachhawn bawk ang. Premier League club Tottenham pet chhuaktu Gent chuan an Belgian club pui Genk an hmachhawn ve bawk dawn.

Inelna first leg hi March 9-ah khelh a ni ang a, second leg hi March 16-ah khelh a ni ang.

Last 16 Fixture
Celta Vigo vs FC Krasnodar
Apoel vs Anderlecht
Schalke vs Borussia Monchengladbach
Lyon vs Roma
FC Rostov vs Manchester United
Olympiakos vs Besiktas
Gent vs Genk
FC Copenhagen vs Ajax