Gent hneh loin Spurs an tla

Tottenham Hotspur chu Europa League Round of 32 aṭanga pet chhuah an ni. Tottenham hian khualmuala goal khat faia an hneh loh tawh Gent an mikhual a, Wem­bley Stadium-ah 2-2 in an in­hnehtawk. Inkhel pahnih belh­khawmah Spurs hi 3-2 in an chak lo.

Ningani zan inkhelah Harry Kane-a'n an lamah a ti lut a, Gent tan Jeremy Perbet chuan goal khat a khung bawk. Spurs midfielder Dele Alli chu first half zawh hmain hnawhchhuah a ni a, Christian Eriksen leh Victor Wanyama te goal khungin London club a chhanhim zo lo a, Europe-a Spurs zinkawng a tawp.

Spurs mangchhia
Mauricio Pochettino-a'n second leg inkhelh ṭan hmain fans puihna an mamawh thu a sawi a, Wembley Stadium-ah mipui 80,465 zet an pungkhawm. Europa League inkhel entu tam ber ṭum record a ni. Fans ṭhahnem tak pungkhawm hmaah Eriksen chuan Gent keeper Lovre Kalinic dan hman loin minute 10-na lekah first leg-a an si phurh a sut a, 1-1 chiah a ni.

Spurs phur vanglai takin Kane a chesual. England inter­national striker hian corner aṭanga ball lo kal chu an lamah a tauh goal, keeper Hugo Lloris tan dan hman a ni lo. Alli-a'n Genk midfielder Brecht Dejaegere a tlawh tluk avangin referee Manuel de Sousa-a'n a hnawt chhuak.

Alli hi kum 2015 May thlaa Stoke nen an inhmachhawn ṭuma red card hmutu Vlad Chiriches hnuah Spurs player zinga hnawhchhuah tawk leh hmasa ber a ni. Player an kim loh bakah goal khat an phurh avangin Spurs dinhmun a chhe hle. Pochettino naute hian minute 61-naa Wanyama goal hmangin beiseina an chhi nung a, minute 10 pawh awm tlin tawh lohah first leg-a goal awmchhun khungtu Perbet chuan Gent chakna goal a khung thung.

A mak...
Argentine manager Po­chettino-a'n kum 2014 aṭang khan Tottenham hi a enkawl ṭan a, Premier League-ah chuan team ṭha ber pawl ni chhoin nomawi inchuh zingah an tel phak ziah, kuminah pawh Chelsea, Man­chester City, Arsenal leh Liver­pool te nen champion thei an la ni.

Mahse, Spurs hian Europe-ah beisei an phak thei lo. Tun hnaiah season ruk chhung chu Europa League an khel ziah a, vawi khat bak quarter final an lut phak lo. Season hmasa khan league-a pathumna niin Champions League an khel a, group stage an paltlang zawh loh vanga Europa League khel zui hi an ni.

White Hart Lane sak ṭhat mek a nih avangin Tottenham hian European game bika an home match khelh nan Wembley an hmang a, England-a khelmual hmingthang hi an hmangthiam lo hle, match an khelh hnuhnung pariatah vawi khat chiah hnehna an chang.

Belgian league-a pariatna Gent hi Belgian club zingah European competition-a Eng­lish club hneh thei hmasa ber an ni a, qualifying chhiar tel chuan kum 2008-09 khan Everton chu Standard Liege lakah an tlawm tawh.

Pochettino a lawm lo
Tottenham manager Pochet­tino chuan, "A lungchhiat thlak hle. Min ṭan turin fans an rawn kalkhawm hnem em em a, inkhel bulṭan hnu lawkah goal kan khung avangin beiseina pawh a sang hle. Mahse, vanduai thlak takin kan lamah a lut zui a, player kan kim lo zui bawk," tiin a sawi.

Pochettino chuan sawi chhunzawmin, "Second half-ah kha chuan kan theihna zawng zawng kan hmang zo vek a ni ber, Wanyama goal khan beiseina min siamsak leh a, a dang khung belh thei ni ila chuan thil a danglam ngei ang," a ti.

Spurs hian kum 2008 hnu lamah nomawi an la chawi leh lo a, tun season-ah league leh FA Cup an la beisei mek. Pathianni zan khian White Hart Lane-ah Stoke City an lo mikhual ang.

Inkhel dang
Borussia Monchengladbach chuan goal thum an phurh zet hnuah Fiorentina 4-3 in an lehthal a, Greman club tan hian forward Lars Stindl chuan hattrick a siam. French Ligue 1 lama beisei phak lo Lyon-in Europe-ah result ṭha an nei zel thung. Nabil Fekir goal thum khung chhawr ṭangkaiin AZ Alkmaar 7-1 in an hneh a, inkhel pahnih belhkhawmah 11-2 zetin hnehna an chang.

Serie A pahnihna AS Roma chu a zawna match 16 chhung zet an khelmuala an tlawm loh hnuah Villarreal 1-0 in an hneh lo. Italian club hian Spain-a first leg an khelh ṭumin 4-0 a hnehna an chan tawh avangin 4-1 in an tlang.

Inkhel Results
Osmanlispor 0 - 3 Olympiakos Piraeus
APOEL 2 - 3 Athletic Bilbao
Ajax 1 - 0 Legia Warszawa
Zenit 3 - 3 Anderlecht
Anderlecht hi away gole rule hmangin an chak
Roma 4 - 1 Villarreal
Besiktas 5 - 2 Hapoel Be'er Sheva
Genk 3 - 2 Astra
Copenhagen 2 - 1 Ludogorets
Shakhtar Donetsk 1 - 2 Celta de Vigo
Tottenham Hotspur 2 - 3 Gent
Sparta Praha 1 - 5 Rostov
Fiorentina 3 - 4 Borussia M'gladbach
Lyon 11 - 2 AZ