Atletico khelmualah Barcelona leng dawn
Pathianni zan dar 8:45-ah Barcelona chuan Atletico Madrid an lenchilh dawn - Catalan club-in La Liga nomawi chawi an duh chuan Valencia laka Real Madrid chak loh chhawr ṭangkaia hnehna an chan a ṭul dawn a, Atletico tan Champions League beiseina chhi nung turin chak a ṭul bawk.
Valencia laka tlawm hlim Real Madrid-in Pathianni zan dar 1:15-ah Villarreal an lenchilh dawn bawk a, Zinedine Zidane-a'n a naute hi insiamṭha turin a beisei ang - nomawi beisei Barca an hla lo tlat!
Barca thawh a hun!
Barcelona-in tun season-ah beisei an phak loh avangin coach Luis Enrique dinhmun a derthawng nia sawi a ni a, hetihrual hian Catalan club defender Gerard Pique chuan an ṭhat dan bera khelhchhuah a hun leh tawh thu a sawi.
Pique chuan, "Kan ṭhat dan berin tun hnaiah kan khel lo tih kan hai lo a, kan dik lohna lai hmuhchhuah hi kan tum ber chu a ni. Kan khelh dan ṭhin ang khan khelh a hun leh tawh a ni," tiin a ṭhiante a fuih.
Barcelona hian Pep Guardiola enkawlna hnuaiah ball an in pass hnem ṭhin a, an hmingṭhatpui hle. Luis Enrique enkawlna hnuaiah erawh 'direct play' hmanga khelin mual ding lamah Lionel Messi a awm tam a, Luis Suarez chu khelmual laiah hmun awl tam zawk pek a ni.
Enrique-a'n a season hmasa berah treble nomawi chawiin he 'style' hi hlawhtlinpui mah se tun season-ah erawh beisei a phak lo a, Spanish manager chungah boruak a sang sawt hle. Enrique hian Barca thiam dan bera khelh let leh kha a thlang dawn nge a dinna ngaiah a ding reng dawn? tih chu Atletico lakah chhanin a awm dawn.
Atletico harhtharna
Atletico Madrid-in nikum lama tawlhthluk zeuh an chin avangin La Liga nomawi beisei chi an ni tawh lo a, tun hnaiah erawh an insiamṭha mek. Kum 2017 La Liga match an khelhah Atletico hian tlawm hmel an hmu leh tawh lo - Barca tan hna a hautak sawt dawn tihna a ni.
Diego Simeone-a naute hian an tlangnel ṭhinna Europe lamah pawh an ze ngai an la theihnghilh lo a, Champions League last 16-a Bayer Leverkusen sawp hlim an nih avangin an phur khawp ang.
Madrid khaw club tan hian Kevin Gameiro chu harhtharna chang langsar zual a ni a, French forward hian Sporting Gijon laka hattrick a siam hnu lawkah Leverkusen lakah goal khat khungin assist a nei bawk. Fernando Torres, Antoine Griezmann leh Yannick Carrasco-te hming hi lam hmaih atan chuan a lian lutuk hret bawk - Paris Saint Germain laka goal li chhuahtu Barca tlarhnung tan hna a tam dawn.
Engtinnge Real?
Real Madrid-in khualmuala La Liga match an khelh hnuhnungah vawi liah vawi khat chiah hnehna an chang thei a, Pathianni zanah Villarreal an lenchilh dawn - Yellow Submarine hian tun season-ah an khelmualah match hnih chiah tlawm hmel an la hmu a, Real tan fiahna hautak tur a ni.
La Liga hmahruaitu ni mek Real Madrid captain Sergio Ramos chuan, "Hnehna chan loh chu a hrehawm ṭhin a, mah se kan hnunga thil awmte chu theihnghilha Villarreal nena kan inkhel tur lamah rilru pek a hun tawh. La Liga hi rei tak khelh tur a la awm," tiin season ala zawh loh thu a sawi a, Valencia laka tlawm hlim an nih avanga hnual lo turin a ṭhiante a fuih.